"Son qərarları dəstəkləyirik. Əvəzedicilərin çempionatının ayrılması lap yerinə düşdü. Çünki müstəqil divizion komandalarında gənc futbolçu limiti tətbiq olunur. Əvəzedicilər isə əsas komandada cəzalı durumda olan futbolçuları oynadanda çətinliklə üzləşirik, uduzuruq. Gələcəkdə gənc oyunçu limitinin də dəyişməsini istərdik. 2-3 gənc oyunçu limitinin tətbiqi daha çox ürəyimizcədi. "Mingəçevir", demək olar ki, yenidən formalaşdırılıb. 15-16 yaşlı oyunçuları güclə yetişdirə bilmişik. Gələcəkdə daha aşağı yaş qruplarını da inkişaf etdirəcəyik. Region Liqasından hansı komandaların divizionda çıxış etməyə layiq olduğuna gəlincə, konkret ad çəkməyim düz çıxmaz. Amma infrastrukturu olan, tələblərə cavab verən, həmçinin futbol ənənəsi olan rayonların təmsilçilərinə üstünlük verilməlidi. Futbolumuzda bölgə komandaları nə qədər çox olsa, bir o qədər yaxşıdı. Rayonlarda futbola maraq daha böyükdü. Məsələn, biz Region Liqasında "Cəbrayıl"ı qəbul edəndə tribunalara 4200 azarkeş toplaşmışdı. Əminəm ki, AFFA rəhbərliyi hansı klubların divizionda çıxış etməyə layiq olduğunu bizdən daha yaxşı bilir".