Martın 7-də AFFA İcraiyyə Komitəsinin növbəti iclası keçirildi.

Toplantında vacib qərarlar qəbul olundu. Əsas diqqət çəkən məqamlardan biri İntizam Komitəsi ilə bağlı idi. Qurumda bəzi dəyişikliklər olsa da, sədr postunda qaldı. Söhbət Erkin Hüseynovdan gedir. Adı çəkilən şəxslə əlaqə saxlayıb həm qurumdakı dəyişikliklər, həm də digər məsələlərlə bağlı söhbətləşdik.

“Football-plus.az” Erkin Hüseynovun müsahibəsini təqdim edir.

- AFFA İcraiyyə Komitəsi tərəfindən yenidən İntizam Komitəsinin sədri seçilməyiniz münasibəti ilə sizi təbrik edirik. Federasiya rəhbərliyinin yenidən sizə güvənməsi barədə nə deyə bilərsiz?

- Yenidən AFFA İntizam Komitəsinə sədr seçilməyimlə bağlı məni təbrik etdiyizə görə təşəkkürümü bildirirəm. Əvvəlcə qəzetinizin və saytınız bütün kollektivini, futbol ictimaiyyətini və azarkeşlərimizi qarşıdan gələn Novruz bayramı münasibəti ilə təbrik edir, hamıya işində və həyatında yeni uğurlar arzulayıram. AFFA-nın İntizam Komitəsində 2016-cı ildən çalışıram. Əvvəllər adi nümayəndə kimi seçilmişdim. Həmin vaxt İntizam məcəlləsinə bəzi dəyişikliklər etmişəm. Futbolla bağlı fikirlərim həmişə rəhbərlik tərəfindən bəyənilirdi. Harda çalışmağımdan asılı olmayaraq, həmişə prinsipiallıq və düzgünlüyü seçmişəm. AFFA nümayəndəsi kimi oyunlara təyinat alıram. Mənim də azarkeşlik etdiyim komandalar var. Ancaq nümayəndə və komitə sədri kimi qərar verərkən heç vaxt hansısa klubun tərəfini tutmamışam. Heç kimin haqqına girməmişəm. Bəlkə də AFFA-nın mənə etimad göstərməsi bundan irəli gəlir.

- AFFA-nın digər qurumlarında rəhbər dəyişiklikləri baş verdi. Sizdə isə olmadı. İntizam Komitəsində yalnız üzvlər arasında köklü dəyişikliklər oldu, yeni kollektiv formalaşdı. Demək olarmı ki, işinizdə çətinliklər olacaq? Yoxsa əksinə, yeni kollektiv daha istəkli olacaq və işləriniz asanlaşacaq?

- Demək istərdim ki, yalnız katib və İntizam komitəsinin inspektoru vəzifəsində qaldı. Onların ikisi də hüquqşünas və təcrübəli işçidi. Yeni kollektivi AFFA, PFL, Hakimlər Komitəsinin təcrübəli nümayəndələri formalaşdırdı. Bu, işimizin daha da səmərəli olmasına böyük köməkdi. Gələcəkdə çıxarılan qərarlar zamanı bütün bu şəxslərin fikirləri işimizə düzgün qiymət vermək, qanuna uyğun qərarların verilməsində vacib rol oynayacaq. Mən buna tam əminəm. Necə deyərlər, ağıl ağıldan üstündü.

- İntizam Komitəsinin rəhbəri kimi qurumun işində hansı çətinlik və ya problemləri görürsüz?

- İş varsa, çətinlik də var, problem də. Şükürlər olsun, çətinliyimiz o qədər də çox deyil. Bizim qərarlar əsasən hakimlərin, AFFA nümayəndələrinin yazdıqları raportlar əsasında verilir. Bəzi səriştəsiz, öz işinə normal yanaşmayan AFFA nümayəndələrinin yazdığı qeyri-peşəkar raportlara görə çıxarılan qərarlar bizə problem yaradır. Məsələn, meydana kənar əşya atılmasını, pozuntunu törədən klubun göstərilməməsini, xırda şeylərə görə lazımsız qeydlərin aparılmasını, bəzi gənc hakimlərin yazdığı protokollarda pozuntunun tam təfsif olunmaması və s. Gələcəkdə belə problemlərin həll olunacağına inanıram.

- Arxada qalan müddət ərzində heç olub ki, hansısa futbolçuya, kluba, rəsmi şəxsə cəza verərkən ictimaiyyətin təzyiqinə məruz qalmayasız deyə və ya başqa şeyə görə cəzanın yüngülləşməsinə gedəsiz?

- Dediyim kimi, bu işlə 8 ilə yaxındı məşğulam. İşimə diqqət və sevgi ilə yanaşmışam. Bizim komitə kollegial orqandı. Yəni qərar bir nəfər tərəfindən verilə bilməz. Bu məsələlər səsvermə yolu ilə həyata keçirilir. Heç bir təzyiq və başqa hallar işimizə təsir edə bilməz. İntizam Komitəsi müstəqil qurum olduğuna görə heç sifarişi qəbul etmir. Cərimə və cəza verilərkən hər şey nəzərə alınır. İntizam məcəlləsində pozuntulara görə yüngülləşdirmə və ağırlaşdırma halları nəzərdə tutulub. Futbolumuzun inkişafına görə verdiyimiz hansısa bir qərar futbol qanunlarına söykənməlidi. Hansısa klublar barədə çıxarılan qərarlar barədə fikir söyləmək istəməzdim. Buna görə kimsə məndən küsə bilər.

İLKİN SULTANLI