Ötən sayımızda “Fənərbaxça”nın böyük bir haqsızlıqla üzləşdiyini xəbər vermişdik.

"Football-plus.az" xəbər verir ki, “Fənər” fanatları ötən şənbə günü tribunalarda “hökumət istefa” şüarı səsləndirməklə Türkiyə futbolunda yeni qalmaqala səbəb olmuşdular. Bu şüar iqtidaryönlü partiyaların, xüsusilə də Milliyətçi Hərəkat Partiyasının xoşuna gəlməmişdi. “Fənər”liləri yalnız “Beşiktaş” fanatları dəstəkləmiş və onlar da eyni şüarı səsləndirmişdilər. “Kayserispor” da daxil olmaqla digər klublar isə hökumətin tərəfini tutmuşdu.

Daha sonra “Kayserispor”un müraciətinin ardından Kayseri Bölgə Təhlükəsizlik Komitəsi “Fənər”lilərin bu həftə “Kadir Has” stadionuna buraxılmaması ilə bağlı qərar qəbul etdi. “Kayserispor” – “Fənərbaxça” oyunu bu gün Bakı vaxtı ilə saat 20.00-da başlayacaq. “Fənərbaxça” rəhbərliyi bu qərarı “Türkiyə futboluna qarşı təxribat” adlandıraraq onu sərt şəkildə qınadı və qüvvədən düşməsi üçün hər şey edəcəyini bildirdi. İstanbul nəhəngi Kayseridə yaşayan və elektron bileti olan vəkillər Ahmet Demirci, Nilay Şenyuz Deligezər və Ömər Deligezərin vasitəsilə Kayseri 2-ci İdarə Məhkəməsinə baş vurdu. Bundan sonra bir neçə saat ərzində qərar iki dəfə dəyişdi. Əvvəlcə Kayseri 2-ci İdarə Məhkəməsi “Fənər”lilərin stadiona girişinə qoyulan qadağanı aradan götürdü! Türkiyə mətbuatında artıq fanatların tribunalara buraxılacağı barədə xəbərlər yayıldı. Amma dünən günorta bu dəfə Kayseri şəhər bələdiyyəsi məsələyə qarışaraq qadağanın aradan qaldırılmasına etiraz etdi. Bu etiraz qəbul edildi və “Fənərbaxça”lıların stadiona girişinə ikinci dəfə qadağa qoyuldu. Maraqlıdı ki, “Fənərbaxça” və klubun vəkilləri ikinci qadağaya da etiraz etdilər.

Bu arada dövlətin başında duranlar ötən şənbə günü “Ülkər” stadionunda “hökumət istefa” qışqıranlara qarşı əməliyyata başlayıb. Belə ki, bu şüarı səsləndirənlər bir-bir ortaya çıxarılaraq idmanda şiddətin qarşısının alınması üçün qüvvəyə minən 6222 nömrəli qanunu pozmaqda günahlandırılıblar! Bu qanunun maddələri təzahürata əsasən dəyişir. Amma nəticə etibarilə günahkar sayılanlar ən yaxşı halda bir müddət idman tədbirlərinə buraxılmır. Ən pis halda isə bir müddət həbsxanada keçirməli olurlar. Son iki gündə “Fənərbaxça”nın 30-dan çox azrakeşinin evinə rəsmi məktub gəlib! Onlar 6222 nömrəli qanunun 14.1 və 18.3 maddələrini pozmaqda günahlandırılıb. Həmin azarkeşlərin idman tədbirlərinə getməsinə qadağa qoyulub və onların məsələsi İstanbul Anadolu Cümhuriyyət Baş Prokurorluğu tərəfindən araşdırılmağa başlanılıb! Bu fanatlardan “Fənər”in oyunundan bir saat öncə polis bölmələrinə gəlmələri tələb olunub. 2018-dən bəri İdman Arbitraj Məhkəməsinin üzvü olan vəkil Emin Özkurt bunu əsl qalmaqal və hüquq qətliamı adlandırıb. O, “hökumət istefa” şüarında təhdid və ya təhqir olmadığı üçün onun 6222 nömrəli qanuna salınmasının yanlış olduğunu, insanların söz haqqının əlindən alındığını vurğulayıb. Özkurt stadionlarda tez-tez “rəhbərlik istefa” şüarlarına rast gəlindiyini deyib. Onun sözlərinə görə, bu şüara görə cəza verilmirsə, “hökumət istefa” şüarına görə də cəza vermək düzgün deyil.