Lionel Messi şok təhlükə ilə üzləşib. Ulduz futbolçu vətəni Argentinada ölümlə hədələnib.

"Football-plus.az" xəbər verir ki, hadisə onun doğulub boya-başa çatdığı Rosario şəhərində baş verib.

Cümə axşamına keçən gecə yerli vaxtla saat 3:20-də kimliyi məlum olmayan bir neçə şəxs Messinin həyat yoldaşı Antonela Rokkutsonun ailəsinə məxsus Lavalle küçəsindəki supermarketə silahlı hücum edib. Onlar 35 yaşlı futbolçuya da təhdid mesajı göndəriblər. Polis mağazanın giriş qapısında qoyulan karton üzərindəki yazını ictimaiyyətə çatdırıb. Orda bu cümlələr yazılıb:

“Messi, səni gözləyirik. Yavkin (Rosario Şəhər Bələdiyyəsinin başçısı Pablo Yavkin - red.) - narkotik taciri sənə kömək edə bilməyəcək”.

Yerli mənbələrə görə, silahlı basqın nəticəsində xəsarət alan olmayıb, amma supermarketə zərər dəyib. Messidən fərqli, Rokkutso ailəsinin ünvanına heç bir hədə yönəldilməyib. Polis küçədə 12 giliz, mağazanın bəzi yerlərində isə 14 güllə dəliyi aşkar edib. Hücumun hadisə yerinə motosikl ilə gələn iki nəfər tərəfindən təşkil edildiyi və onlara görə yerli xuliqanların məsuliyyət daşıdıqları ehtimal olunur.

Qeyd edək ki, şəhərin meri bir ay əvvəl yerli “Rosario Sentral”ın baş məşqçisi Migel Anxel Russonu ictimaiyyət önündə kəskin tənqid etmişdi. Buna isə çalışdırıcının bir sıra futbolçuların təhlükəsiz şəhər sayılmayan Rosarioda yaşamaq və yerli komandada oynamaq istəmədiyini etiraf etməsi səbəb olmuşdu.

Argentina Prokurorluğu məsələ ilə bağlı araşdırmaya başlayıb. Cinayət işinin təhqiqatı ilə prokuror Federiko Ribela məşğul olur. O, polisə hadisə yerinin təftişi, şahidlərin ifadəsinin alınması, ballistik ekspertiza aparılması və videomüşahidə kameralarının yoxlanılması ilə bağlı göstərişlər verib.

Yeri gəlmişkən, Messi DÇ-2022-nin qalibi olan Argentina yığmasında birlikdə çıxış etdiyi komanda yoldaşlarına və məşqçilərə hədiyyə alıb.

Bu haqda “The Sun”a müsahibə verən telefonların bəzədilməsi üzrə ixtisaslaşan “Indesign Gold” şirkətinin sahibi Benjamen Lion bildirib. O, ulduz futbolçunun komanda üzvlərinə qızıl təbəqəsi ilə örtülmüş “iPhone 14 Pro” markalı mobil telefon hədiyyə etdiyini deyib. “The Sun” Messinin 35 telefona ümumilikdə 175 min funt sterlinq (təxminən 200 min avro) xərclədiyini də yazıb.

Qeyd edək ki, Messi DÇ-2022-nin ən yaxşı futbolçusu seçilmişdi.