İngiltərədə mövsümün ilk titulu sahibini tapdı.

Bazar günü MY ilə “Nyukasl” Liqa kubokunun finalında üz-üzə gəldi. “Sağsağanlar”ın bütün fədakarlığına baxmayaraq, daha titullu komanda qələbəni bayram etdi. Qarşılıqlı sürətli hücumlar şəraitində keçən debütdən sonra komandalar bir qədər sakitləşdi. Onlar ehtiyatlı oynamırdılar, sadəcə, müdafiədə tam diqqətli davranırdılar. “Nyukasl”ın topa daha çox yiyələnməsi mankunianlar üçün problem deyildi. 33-cü dəqiqədə Reşforda qarşı kobudluğa görə təyin olunan cərimə zərbəsini Şou yerinə yetirdi və onun asmasını Kazemiro tamamladı. Bir neçə dəqiqə sonra isə MY kuboka daha da yaxınlaşdı. Reşford zərbə vurdu, Botmanın ayağından səkən top tora düşdü. MY fasilədən sonra qələbə hesabını qorumaqla məşğul oldu. “Nyukasl” isə sona qədər hücum etsə də, fərqlənə bilmədi.

Faktlar
* Tarixində 6-cı dəfə Liqa kubokunu qazanan MY bu göstəricidə yalnız “Mançester Siti” (8) ilə “Liverpul”dan (9) geri qalır.

* MY Ten Haqla ilk qənimətini qazandı. 53 yaşlı niderlandlının hesabında artıq 7 titul var. O, MY-yə qədər “Ayaks”la 6 titul (3 çempionluq, 2 kubok və Niderland Superkuboku) qazanıb.

* MY Mourinyo dönəmindən bəri ilk titulu qazandı. Mançester klubu 2017-nin mayında Avropa Liqasının finalında “Ayaks”a qalib gəlmiş (2:0), elə həmin il Liqa kubokunu da götürmüşdü. MY 2017-nin avqustunda UEFA Superkuboku uğrunda oyunda “Real”a uduzdu (1:2) və həmin vaxtdan bəri bir dəfə də finalda göründü – Sulşerin rəhbərlik etdiyi komanda 2021-də Avropa Liqasının finalında “Vilyarreal”a uduzdu. Mourinyo ilə Ten Haqın qazandığı titulları bir-birindən 5 il və 278 gün ayırır.

* MY-nin heyətində 181-ci “quru” oyununu keçirən De Xea klub rekordunu yenilədi. Əvvəlki rekord (180) Peter Şmeyhelə məxsus idi. De Xeanın “Yunayted”in heyətində 522 oyun keçirdiyini də xatırladaq.