Gentdə oyuna maraq azdı: “Şəhərdə afişalara rast gəlmədik” - Tarixi oyuna 8 saat qaldı
Bu gün “Qarabağ” taleyüklü matça çıxacaq. Qurban Qurbanovun komandası “Gent” səddini aşacağı təqdirdə ölkə futbolu adına daha bir ilkə imza ata bilər. Görəsən, cavab görüşü ərəfəsində matçın keçiriləcəyi şəhərdə vəziyyət necədi?
Football-plus.az olaraq, bu suala cavab tapmaq üçün hazırda Belçikada olan həmkarımız, haqqın.az saytının əməkdaşı Elmir Əliyevlə əlaqə saxladıq:
“Bu gün (dünən) Genti bir az gəzdik. Oyuna maraq elə də böyük deyil. Yerli jurnalistlərlə söhbətləşmək imkanım oldu. Onlar da etiraf etdilər ki, oyuna maraq istənilən səviyyədə deyil. Satışa 20 min bilet çıxarılsa da, heç yarısı satılmayıb. Şəhərdə afişalara da rast gəlmədik. Belçikalı jurnalistlər “Gent”in “Qarabağ”la cavab oyununa itkilərlə çıxacağını bildirdilər. Əsas heyətin iki üzvü son çempionat oyununda ciddi zədələnib. Onların meydana çıxıb-çıxmayacağı oyun günü məlum olacaq”.
Həmkarımız bizlə söhbətdə “Qarabağ”ın Gentdə dəstəksiz qalmayacağını da söylədi:
“Komandamızın Gentdə dəstəksiz qalmayacağı dəqiqdi. Ancaq azarkeşlərin sayı barədə dəqiq məlumat yoxdu. Bu suala oyun günü aydınlıq gələcək. Belçikada şəhərlər bir-birinə çox yaxındı. Maksimum 20 dəqiqəyə istər qatarla, istərsə də avtobusla birindən digərinə getmək mümkündü. Ola bilər ki, Belçikanın başqa şəhərlərində yaşayan azərbaycanlılar və türklər sabah stadiona gəlsinlər”.
RƏŞAD
Digər xəbərlər
