Avropanın ən mötəbər klub turnirində 1/8 final həyəcanı davam edir.

Football-plus.az xəbər verir ki, bu gün" Leytsip" "Mançester Siti"yə, "Portu" "İnter"ə qarşı oynayıb.

1/8 final, ilk oyunlar

22 fevral

Leyptsiq – Mançester Siti 1:1
Yoşko Qvardiol, 70 - Riyad Mahrez, 27

Hakim: Sərdar Gözübüyük (Niderland)

Cəzalı: yoxdu

Avokuboklardakı oyunlarının balansı: +1=0-1

Yenə ÇL-i qazanmaq arzusu ilə alışıb-yanan “Mançester Siti” bu dueldə aşkar favorit sayılır. Amma “Leyptsiq” yüksək səviyyəli komanda olduğunu və ən azı ev oyununda istənilən rəqibi yenməyə qadir olduğunu coxdan sübut edib. Bu mövsüm qrupda “Real”ın “Red Bull Arena”dan məğlub ayrıldığını xatırlamaq kifayətdi. Elə “şəhərlilər” də bu stadionda oynamağın necə çətin olduğunu gözəl bilirlər. Çünki bu komandaların yolu ötən mövsüm qrup mərhələsində kəsişmiş və “Siti” Almaniyadan 1:2 hesablı məğlubiyyətlə dönmüşdü. Düzdü, həmin vaxt Qvardiolanın komandası motivasiyasız idi və pley-offu təmin etmişdi. “Leyptsiq”in lideri Nkunkunun zədəsini sağaldaraq sıraya qayıtması, sözsüz, “öküzlər” üçün yaxşı xəbərdi. Bu futbolçu ötən mövsüm “Etihad”da “Siti”yə 3 top vurmuşdu! “Siti”, adətən, bu mərhələdə sürprizə imkan vermir. Komanda konkret 1/8 finalda keçirdiyi son 10 matçın 8-də qalib gəlib (1 heç-heçə, 1 məğlubiyyət). “Şəhərlilər”in 1/8-i aşa bilməməsinə sonuncu dəfə 2016/17-də “Monako” ilə dueldə rast gəlinib. Onu da bildirək ki, “torba-torba” qollar vuran Holann Almaniyada oynadığı 2,5 il ərzində “Leyptsiq”ə qarşı keçirdiyi 4 görüşdə 6 dəfə fərqlənib.

İnter – Portu 1:0
Romelu Lukaku, 86

Hakim: Srcan Yovanoviç (Serbiya)

Cəzalı: yoxdu

Avokuboklardakı oyunlarının balansı: +2=1-1

İki fərqli dönəmdə (1999-00, 2003-04) “Latsio”da birlikdə top qovmuş Simone İnzaqi ilə Serjio Konseysaonun klublarının duelini izləyəcəyik. Buna qədər bu kollektivlərin yolu iki dəfə kəsişib. 2004/05-də “İnter” ÇL-in 1/8 finalında üstün olmuşdu (evdə 3:1, səfərdə 1:1). Özü də “Portu” həmin vaxt turnirin son qalibi statusunda idi. Düzdü, növbəti mövsüm “Portu” qrupda bu rəqibdən iki oyunun nəticəsinə görə üstün oldu (evdə 2:0, səfərdə 1:2). Amma “əjdahalar” həmin vaxt qrupu sonuncu, milanlılar isə 1-ci pillədə başa vurmuşdular. Maraqlıdı ki, 18 il əvvəl portuqaliyalıların heyətində olan Pepe indi də komandadadı! Həftəsonu “Udineze”ni yenməklə “İnter” doğma meydanda son 13 rəsmi oyunda 12-ci qələbəsini qazandı. Komanda bu müddətdə cəmi 4 top buraxıb. Amma yanvarın 23-də “Empoli”yə minimal hesablı məğlubiyyət onu göstərir ki, “neradzurra” öz meydanında yenilməz deyil. Milan təmsilçisinin xeyrinə olan əsas məqam odu ki, bu komanda indiyə qədər evdə Portuqaliya klublarına qarşı keçirdiyi 9 oyunun heç birində uduzmayıb (8 qələbə, 1 heç-heçə). Digər tərəfdən “Portu” son illərdə ÇL-in 1/8 finalında iki dəfə İtaliya klublarını (2018/19-da “Roma”, 2020/21-də “Yuventus”) mübarizədən kənarlaşdırıb. Hər iki halda qalib əlavə vaxtda müəyyənləşib.

21 fevral

Liverpul – Real 2:5
Darvin Nunez, 4, Muhammed Salah, 14 - Vinisius Cunior, 21, 36, Eder Militao, 48, Kərim Benzema, 56, 67

Hakim: İştvan Kovaç (Rumıniya)

Cəzalı: yoxdu

Avokuboklardakı oyunlarının balansı: +3=1-5

“Bavariya” – PSJ cütündə olduğu kimi, “Liverpul” ilə “Real” da son illərdə bir-birinə tez-tez rəqib olur. Son 9 mövsümdə bu komandaların artıq 5-ci dəfə yolu kəsişir. Düzdü, bu qarşılaşmalar, adətən, maraqlı və gərgin keçir. Amma qələbə əsasən Madrid nəhənginə qismət olur. “Kral klubu” bu rəqibə qarşı keçirdiyi son 6 görüşdə uduzmayıb və bunların 5-də qalib gəlib! Maraqlıdı ki, bu seriyaya qədər “Liverpul” “Real”a qarşı keçirdiyi hər 3 oyunda qələbə qazanmışdı. Təbii ki, ötən mövsümdəki finalda da bu kollektivlərin üz-üzə gəlməsi bu duelə bir qədər də intriqa qatır. Üstəlik 2018-dəki finalda da bu klublar qarşılaşmışdı. “Liverpul” Yürgen Kloppun dönəmində ən zəif mövsümünü keçirir. Komanda çempionluq mübarizəsindən çəkilib və yalnız ilk “4-lük” uğrunda mübarizə aparır. Ona görə də ÇL faktiki mersisaydlıların gözünü dikə biləcəyi yeganə turnirdi. “Real” isə hələ ki qatıldığı bütün turnirlərdə iddiasını davam etdirir. Ötən mövsüm pley-offlarda xarüqələr yaradan Kərim Benzema bu dəfə də madridlilərin əsas qol silahı olacaq. Ünlü fransalı forvard indiyə qədər ÇL-də İngiltərə klublarına qarşı keçirdiyi 23 oyunda 16 dəfə fərqlənib və ingilislər onun ən sevimli rəqibidi.

Ayntraxt F – Napoli 0:2
Viktor Osimhen, 40, Covanni di Lorentso, 65
Qolla nəticələnməyən penalti: Xviça Kvaratsxeliya, 36

Hakim: Artur Diaş (Portuqaliya)

Cəzalı: yoxdu

Avokuboklardakı oyunlarının balansı: +2=0-0

Turnir ÇL adı ilə keçiriləndən bəri ilk dəfə burda iştirak edən “Ayntraxt”ın birinci cəhddən pley-offa vəsiqə qazanması alqışalayiq haldı. “Ayntraxt” pley-offda oynayan 11-ci Almaniya klubu olacaq. Bunun sayəsində Almaniya turnirin pley-offunda 10-dan artıq klubla təmsil olunan ilk ölkə kimi tarixə düşəcək. Bu klubların pley-offa gedən yolu fərqli olub. “Napoli” qrupda ilk 5 oyununda qalib gəlməklə asanlıqla istəyinə çatmışdısa, “qartallar” yalnız qrupun “Sportinq”ə qarşı son oyununun 2-ci hissəsində 2 qol vurmaqla 2-ci pilləni rəsmiləşdirmişdilər. “Napoli”ni həm büdcəsinə, həm mövsümü hansı səviyyədə keçirməsinə, həm də təcrübəsinə görə bu duelin favoriti adlandırmaq olar. “Napoli” həqiqətən də mükəmməl formadadı və artıq indidən komandanın bu mövsüm A seriyasında 33 illik həsrətə son qoyaraq çempion olacağı şübhə doğurmur. Bu da Luçano Spallettinin kollektivi üçün əlavə üstünlükdü. Çünki nə qədər qəribə səslənsə də, daxili çempionatda rəqabət yoxdu və komanda rahat şəkildə diqqətini ÇL-ə yönəldə bilər. Digər tərəfdən frankfurtlular Oliver Qlasnerin başçılığı altında indiyə qədər 19 avrokubok matçının yalnız ikisində uduzublar (10 qələbə, 7 heç-heçə). Komandaların buna qədər yolu yalnız bir dəfə kəsişib. 1994/95-də UEFA kubokunun 1/8 finalında “Ayntraxt” həm evdə, həm də səfərdə 1:0 hesabı ilə üstün olmuşdu.