“Barselona” indidən yay transfer əməliyyatına başlayıb. İspaniya nəhəngi yeni futbolçu ilə razılaşıb.

“Sport1” telekanalının yaydığı xəbərə görə, Kataloniya təmsilçisi “Ayntraxt”ın müdafiəçisi Evan Ndika ilə anlaşıb. “Barselona” 23 yaşlı futbolçunu yay “transfer pəncərəsi” açılandan sonra heyətinə qatacaq. Fransalı oyunçunun “Ayntraxt”la müqaviləsinin müddəti bu mövsümün sonuna kimidi. Artıq onun Frankfurt klubu ilə sözləşməni yeniləməyəcəyi dəqiqləşib. Ndika cari mövsümdə bundesliqada 20 oyun keçirib.

Yeri gəlmişkən, “Mançester Siti”nin futbolçusu İlkay Gündoğanın bu yay “Barselona”ya keçmək ehtimalı bir qədər də artıb. Böyük Britaniya mənbələrinin xəbərinə görə, 32 yaşlı yarımmüdafiəçinin meneceri İspaniya klubunun rəhbərliyi ilə görüşüb. Tərəflər arasındakı danışıqların müsbət məcrada getdiyi vurğulanır. Gündoğanın MS ilə müqaviləsinin müddəti yaya qədər nəzərdə tutulub. Türkəsilli almaniyalı futbolçunun Kataloniya klubuna azad agent kimi yollanacağı gözlənilir.

İlkay “şəhərlilər”in formasını 2016-cı ildən geyir. O, bu mövsüm bütün turnirlərdə 31 matçda iştirak edib, 3 qol vurub və bir o qədər məhsuldar ötürmə verib.