Türkiyədə baş verən zəlzələylə bağlı xalqımız qardaş ölkəyə dəstəyini əsirgəmir. Futbol camiəsi də bu yöndə səfərbər olub.

Football-plus.az xəbər verir ki, "Turan Tovuz" bununla bağlı maraqlı kampaniya elan edib.

"Boz qurdlar” bu gün baş tutacaq “Kəpəz”lə qarşılaşmanın bilet satışından əldə olunacaq gəliri yardım üçün Türkiyəyə göndərəcək. Tovuzlu futbolsevərlər də bu kampaniyaya fəal şəkildə qoşulub.

Məsələ ilə bağlı daha detallı bilgi almaq üçün klubun mətbuat katibi Süleyman Tağıyevlə əlaqə saxladıq:

"Türkiyədə baş verən zəlzələyə biganə qala bilməzdik. Ona görə də bileti satışından yığılacaq məbləği təbii fəlakətdən əziyyət çəkən insanlara yardım üçün göndərəcəyik. Sağ olsun rayon sakinləri, kampaniyamıza qarşılıq verdilər. Futbolsevərlər arasında mövsümlük biletləri olanlar da yenidən bilet alır. Hətta uzaq kəndlərdən bizimlə əlaqə saxlayırlar ki, “kart hesab nömrələri atın, pul yükləyək, yaxud qohumlarımıza pul göndərək, onlar sizə çatdırsın”.

Bildiyiniz kimi, şəhid ailələri və qazilər üçün stadionumuza giriş pulsuzdu. Buna rəğmən, xeyli qazi gələrək adambaşına 5-10 bilet alıb yardımını əsirgəmir. Hətta pul ödəyib bileti götürməyənlər də var ki, yenidən satılsın və daha çox pul yığılsın. Sahib Musayev adlı bir azarkeşimiz isə 500 manat verməklə 1 rəmzi bilet aldı. Sözümün canı odu ki, tovuzlu futbolsevərlər hər cür kömək edir və edəcək".

500 manat ödəniş etməklə rəmzi bilet alan Sahib Musayev isə bunları söylədi:

"Əvvəla, klub rəhbərliyinə təşəkkür edirəm ki, belə xeyirxah layihə həyata keçirir. Uzun illərdi komandanın azarkeşiyəm. Türkiyə bizə yaxın, qardaş ölkədi. Ən ağır günlərdə, o cümlədən 44 günlük Vətən müharibəsində yanımızda olub. Ona görə biz də bu ağır gündə türk qardaşlarımızın yanında olmalıyıq. Reklam üçün yardım, kömək etməyi xoşlamıram. Nə etmişəmsə, həmişə Allah və insanlıq naminə etmişəm. Desəm ki, böyük imkanım var, yalan olar. Amma şükür bu günümüzə. Əlim-ayağım yerindədi, işləyib qazanırıq. Yenə də qazanarıq. Odu ki, bizdən daha ağır vəziyyətdə olan insanlara, əsasən də körpələrə, qocalara, qadınlara əlimizdən gələni etmək insani borcumuzdu. Dağıntılar altında qalan körpələri görəndə adamın ürəyi parçalanır.

Əvvəlcə şəklimin və ianəmin reklam olunmasına razı deyildim. Sonra klubun idman direktoru Nadir Nəbiyev dedi ki, qoy insanlar görsün və başqaları da ruhlansın. Ona görə razılıq verdim. Şükürlər olsun, bu az-çox başqalarını da yardıma sövq etdi. Tovuzlular hamılıqla dağıntılar altında qalan qardaş-bacılarımız üçün əlindən gələni etməyə hazırdı. Allahdan dualarımız odu ki, dağıntılar altında qalanların hamısı sağ-salamat çıxsın, itki minimum olsun. Qardaş Türkiyəyə başsağlığı, türk xalqına isə səbr diləyirəm".

ABDULLA İSMAYILOĞLU