Premyer-liqanın 27-ci turu çərçivəsində keçirilən “Zirə” - "Neftçi" oyununda qonaq azarkeşlər polislər tərəfindən stadiondan çıxarıldı.
Buna "Forza Neftçi" fanklubunun üzvlərinin "Samir, istefa", "Kamran, istefa" şüarını səsləndirməsi səbəb oldu.
Görəsən, "Neftçi" azarkeşlərinin polislərin bu hərəkətinə münasibəti necədi? Bu suala aydınlıq gətirmək üçün fanklubun fəallarından olan Aqil Məmmədquliyevlə danışdıq:
"Ölkədə elə ediblər ki, “istefa” deyəndə, elə bilirlər, hər şey siyasidi. “İstefa” sözünə qarşı sanki bir qısqanclıq var. Buna bu qədər reaksiya verilməsinə söz tapa bilmirəm. Bəzi polislər bizə orda deyirdi ki, "rədd ol", “daha ağır, təhqiramiz sözlər deyin, amma “istefa” olmasın”. Bu, absurd yanaşmadı. Həqiqətən ayıbdı. Hərə bir tərəfdə pıçıldayır ki, təhqir et, nə deyirsən-de, “istefa” demə. Gülünc bir durumdu. “İstefa” deyəndə nə olur ki? Bəli, orda polis xəbərdarlıq etdi. Buna baxmayaraq, biz komandamızın oyununa baxa bilməməyi gözə alıb stadionu tərk etdik. Və çıxanda da polislərlə heç bir problem yaşamadıq. Onlardan biri bizə demişdi ki, rəhbərlik tapşırıb. Azarkeşlər arasında anlaşılmazlıq oldu ki, klub rəhbərliyi niyə belə edir? Ondan sonra "Kamran, istefa" şüarı da səsləndirildi. Sonra Kamran Quliyev gəldi. Dedi ki, bizim tapşırığımız deyil. Polislər isə söylədi ki, klubun yox, polis rəhbərliyinin tapşırığıdı. İndiyə kimi də çox olub belə hallar. Bəzi məşqçilər var ki, onların dönəmində “istefa” şüarına görə problem yaşamamışıq. Buna Oqtay Abdullayevi, Qurban Qurbanou nümunə göstərə bilərəm. Amma son illərdə belə hallar çoxalıb. Ümumiyyətlə, "Neftçi" tribunasına çox təzyiq var. Bizi nə qədər bərk sıxsalar, yenə də boş durmuruq. Düzdü, fəxr ediləsi polislərimiz də var. Bir dəfə Lənkəran stadionuna 300-500 nəfər getmişdik. Bəlkə də 5 min adam üstümüzə hücum çəkdi. Polislər orda bizi qorudular. Başqa da belə hallar çox olub. Mən bunları da heç vaxt unutmaram. Düşünürəm ki, problem heç polisdə də deyil. Polisi stadiona gətirəndədi. Son illər elə bir kobudluq da yoxdu ki, qarşısını polislə alsınlar. Müəyyən sayda polis gəlsə, ictimai asayişin pozulduğu zaman öz işini görə bilər. Amma onların azarkeşlərin yanına yerləşdirilməsi doğru deyil".
Məlum olduğu kimi, Samir Abbasov mətbuat konfransında “Forza Neftçi” azarkeş qrupunun rəhbərliyində dəyişiklik olduğunu demişdi. Məsələni Aqil Məmmədquliyevlə dəqiqləşdirdik:
“Forza Neftçi” rəhbərliyində dəyişiklik yoxdu. Lakin qrupun lideri Sübhan Əliyev bəzi şəxsi problemlərinə görə artıq 5 aydı ölkə xaricindədi”.
ŞAİR ABDULLA