Dünən 1-ci divizionun 16-cı turunda "Neftçi-2" "Mingəçevir"lə qarşılaşıb.

“Football-plus.az” xəbər verir ki, matçın 71-ci dəqiqəsində "ağ-qaralar"ın futbolçusu Həbib İsmayılov "işıqçılar"ın hücumçusu İbrahim Camalovla toqquşub. Nəticədə "Neftçi-2"nin üzvünün dili qatlanıb.

Həkimlər futbolçuya dərhal yardım edib. Həbib İsmayılov huşsuz vəziyyətdə xəstəxanaya çatdırılıb. Onun son durumunu öyrənmək üçün klubun Media, Marketinq və İctimaiyyətlə Əlaqələr Departamentinin rəhbəri Rüstəm Allahverdiyevlə əlaqə saxladıq:

“Hansısa ciddi zədəsi yoxdu. Dünən xəstəxanada müayinə olunub. Şükür Allaha, hər şey qaydasındadı. Bir gün xəstəxanada saxladıq ki, ciddi nəzarətdə olsun. Hansısa problem olsa, həkimlər dərhal müdaxilə edə bilsinlər. Yenə deyirəm, ciddi nəsə yoxdu. Hər şey qaydasındadı”.

Qeyd edək ki, qarşılaşma “Neftçi-2”nin 2:1 hesablı qələbəsi ilə başa çatıb.

İLKİN SULTANLI