"Emin Mahmudov tək "Neftçi"nin yox, Azərbaycanın aparıcı futbolçularından biridi" - "Neftçi" azarkeşi
Azərbaycan derbisi bir sıra maraqlı məqamlarla yadda qaldı.
Football-plus.az xəbər verir ki, bunlardan biri də meydan sahiblərinin kapitanı Emin Mahmudovla azarkeşlər arasında yaşanan xoşagəlməz hadisədi. Belə ki, oyun başa çatandan sonra heç bir futbolçu azarkeşlər olan tribunaya yaxınlaşmadı. Ancaq kapitan bu məsuliyyəti üzərinə götürdü. Azarkeşlərlə qısa danışıqdan sonra geri dönən Mahmudov onların vulqar sözlərlə “formanı çıxarın” demələrinə də dözə bilmədi. Bundan sonra o formasını çıxarıb əlində saxladı.
Maraqlıdı, azarkeşlər həmin an məhz Emin Mahmudovu hədəfə almışdı? Niyə ancaq kapitan onlara yaxınlaşdı və qayıdarkən də formanı çıxardı? “Nefçi”nin azarkeşlərlə əlaqələndiricisi vəzifəsinə təyinat alan Aqil Məmmədquliyevlə əlaqə saxlayıb, bu suallara və orda yaşanan hadisəyə aydınlıq gətirdik. Həmsöhbətimiz öncə təyinatına toxundu:
"Rəsmən noyabrın 1-də işə başladım. Lakin bu söhbət, demək olar ki, ilin əvvəlindən başlamışdı. Namizədliyimi kimin təklif etdiyini bilmirəm. Bildiyim odu ki, klub rəhbərliyi öndə gedən azarkeşlərdən soruşublar. Onlar da, yəqin ki, müsbət danışıblar. Rüstəm Allahverdiyev isə bunu Kamran müəllimə bildirib. Ondan sonra dəfələrlə Kamran müəllimlə görüşdüm. Nəhayət, ötən ayın əvvəlində işə başladım. Azarkeşlərlə əlaqələndiriciyəm. Belə desək, klubun daxilində azarkeşlərin nümayəndəsiyəm. Onların sözlərini, fikirlərini kluba, klubunkuları isə azarkeşlərə çatdırıram".
Məmmədquliyevin Azərbaycan derbisində yaşananlara reaksiyası belə oldu:
“Ümumiyyətlə, peşəkar idmanın müəyyən bir səviyyəsi var. Əminəm ki, Emin Mahmudov o səviyyədədi. İdmançı olaraq həmişə tam istədiyini etmədiyini düşünür. Həmişə özündən narazıdı və bundan artığını edə biləcəyini düşünür. Təbii ki, bu düşüncədə olan idmançılar bir peşəkar kimi heç vaxt həmin hesabla barışa bilməzdi. Emin Mahmudov tək "Neftçi"nin yox, Azərbaycanın aparıcı futbolçularından biridi. Heç kim onun haqqında pis söz deyə bilməz. Bizim narazılığımız "Neftçi"nin hazırkı bərbad çıxışı ilə bağlıdı. "Qarabağ"la matçda səsləndirdiyimiz "formanı çıxarın və rədd olun gedin" ifadəsi Eminə aid deyil. Mən 30 ildi "Neftçi" azarkeşiyəm, pis-yaxşı gündə komandanın yanında olmuşam. Zəif çıxışlarımız da olub, amma onda belə komanda döyüşürdü. Hazırda isə oyun planında da heç nə gözə dəymir. "Neftçi"də dəyişikliklər gedir, Müşahidə Şurası yeniləndi. Ümid edirik ki, bunun faydası olacaq. Biz müsbət dəyişikliklər istəyirik... “Qarabağ”la əvvəlki oyuna nəzər salaq. Onda 1:3 məğlub olmuşduq. Komandanın 60-65 dəqiqə göstərdiyi oyuna görə, uduzmaqlarına baxmayaraq, azarkeşlər onları çağırdı və alqışladı. Məsələ ondadı ki, həmin vaxt oyun var idi, hamı meydanda can qoyurdu. Görünürdü ki, ab-hava fərqlidi. Lakin budəfəki “bacarmadıq” sözü başqa bir şeydi. Oyun baxımından bir çox problem var idi. Bundan əvvəlki turda “Səbail”ə qarşı keçirilən qarşılaşmada da bir-iki dəyişiklik oyunu darmadağın etdi və biz artıq həyəcan təbili çalmışdıq. Bu dəfə də vəziyyət elə yerə gəldi ki, uşaqların aqressivliyi son həddə çatdı. Ona görə də belə hadisələr baş verdi. Lakin azarkeşlərin hər birində belə düşüncə var: futbolçu mənim ailə üzvüm kimidi. Yeri gələndə əsəbləşəcəm, yeri gələndə acılayacam və ya öpüb gözümün üstünə qoyacam. Uşaqlar futbolçuları bu dərəcədə çox istəyir. Lakin insan psixologiyasıdı, istər-istəməz davamlı şəkildə belə hallar baş verəndə, “Qarabağ”la oyunda da bu səbəbdən uduzanda əsəblər tarıma çəkilir. “Neftçi” azarkeşi kimi təhqiri qəbul etməsəm də, bunun tərəfdarı olmasam da, azarkeş qrupunun üzvlərini də qınaya bilmərəm. Rəhbərlik özü də bunu başa düşür. Klub rəhbərliyi belə oyundan sonra etiraz edən azarkeşlərə nə deyə bilər ki?”
ŞAİR ABDULLA
Digər xəbərlər
