“Araz Naxçıvan”ın rəhbərliyi iqtisadi fəaliyyət qaydalarını pozmaqda təqsirli bilinir
Növbəti mövsümdən premyer-liqada çıxış edəcəyi söylənilən “Araz Naxçıvan”ın başı dərddədi.
Mətbuatda yayılan xəbərlərə görə, Muxtar Respublika təmsilçisinin rəhbərliyi iqtisadi fəaliyyət qaydalarını pozmaqda təqsirli bilinir. Kluba İnzibati Xətalar Məcəlləsinin 430.4-cü maddəsi ilə protokol tərtib edilib. Naxçıvan təmsilçisi xidmət almaq üçün avans yolu ilə ölkə xaricinə valyuta çıxarıb. Lakin hər hansı xidmət almayıb və həmin valyuta ölkəyə geri qaytarılmayıb. “Sportinfo.az”ın yaydığı xəbərdə o da qeyd olunub ki, protokola Naxçıvan şəhər Məhkəməsində baxılacaq. İddia təsdiqini taparsa, klubu ölkədən çıxardığı valyutanın 30 faizi məbləğinda cərimə gözləyir.
Məsələyə aydınlıq gətirmək üçün Naxçıvan Futbol Federasiyasının sədr müavini Sakit Rzayevlə əlaqə saxladıq. Sakit bəy xəbəri təsdiqləsə də, ətraflı bilgiyə sahib olmadığını söylədi:
“Belə bir məsələ var. Söhbət Uzunoba Təlim-Məşq İdman Kompleksinin tikintisi zamanı xaricdən alınan tikinti materiallarına ödənilən vəsaitdən gedir. Həmin vaxt tikinti üçün materiallar ölkə xaricindən gətirilmişdi. Ola bilsin, sənədləşmə işlərində nöqsana yol verilib. Hansı məbləğdən söhbət getdiyini bilmirəm”.
RƏŞAD
Digər xəbərlər
