Müller fikrini dəyişdi
Tomas Müller bir müddət əvvəl verdiyi qərarı dəyişib.
Football-plus.az xəbər verir ki, “Bavariya”nın təcrübəli futbolçusu Almaniya millisindəki çıxışını davam etdirəcək.
DÇ-2022-nin qrup mərhələsinin Kosta Rika ilə oyunundan (4:2) sonra yığmadakı son matçına çıxdığını bəyan edən 33 yaşlı hücumçu fikrindən daşındığını bildirib. Tomas “Bavariya”nın rəsmi saytına açıqlamasında belə deyib:
“Maçdan sonra əsəbləşmişdim, kədərli an idi. Amma sonra bu barədə bir qədər düşündüm və yığmanın baş məşqçisi Fliklə fikir mübadiləsi apardım. Nə qədər ki, peşəkar futbolçuyam, milli komandaya həmişə hazır olacağam”.
Xatırladaq ki, Almaniya millisi DÇ-2022-də qrupdan çıxa bilməyib. Müller bundestimlə 2014-cü ildə dünya çempionu adını qazanıb. O, 2010-cu ildən indiyədək milli formada meydana çıxdığı 121 oyunda 44 qol vurub.
