Hələ yeni il ərəfəsində “Qarabağ”ın futbolçusu Kadi Borgesin “Krasnodar”a keçəcəyi ilə bağlı söz-söhbət yayılmağa başladı.

Heç şübhəsiz, komandanın aparıcı üzvlərindən birinin itirilməsi sadiq azarkeşlərin kefinə soğan doğramalıydı. Mən həmin azarkeşlərin hisslərini gözəl başa düşürəm. Azarkeş daim komandasının güclü olmasını istəyir. Çünki sevimli komandasından qələbələr, uğurlar gözləyir. Bu mənada “Qarabağ”ın uğurlarında böyük pay sahibi olan Kadinin gedişi onları sevindirə bilməzdi. Braziliyalı yarımmüdafiəçi təkcə “Qarabağ”ın yox, ümumilikdə Azərbaycan premyer-liqasının bəzəyinə çevrilməyi bacarmışdı. Dəfələrlə çətin məqamlarda səhnəyə çıxıb, vurduğu gözəl qollar, verdiyi ağıllı ötürmələr ilə futbolsevərlərin könlünü fəth etməyi bacarıb. Az əvvəl qeyd etdiyim kimi, ona rəğbət bəsləyənlərin sırası “Qarabağ” azarkeşləri ilə məhdudlaşmır, ölkə çempionatında rəqib olan komandalara könül verənlər də qəlbinin dərinliyində Kadini sevir, onun meydanda yaratdığı möcüzələri heyranlıqla izləyirdi.

Mən Kadinin oynadığı futbolun estetik tərəfini bir kənara qoyuram. Heç kimə sirr deyil ki, ölkədə futbolla maraqlananların mütləq əksəriyyəti avrokubok görüşlərində “Qarabağ”ın azarkeşinə çevrilir, bu komandanın uğuruna sevinir, ağdamlıların oyunlarını daha yaxından izləyir. Kadi Borges də avrokuboklarda özünü yetərincə göstərməyi bacarıb. Onu azərbaycanlı futbolsevərlərə sevdirən əsas nüanslardan biri də məhz budu. Elə bu məqamı nəzər alaraq əminliklə deyirəm ki, onun gedişi təkcə “köhlən atlar”ın sadiq azarkeşlərini üzmür, bütünlükdə böyük bir azarkeş kütləsi bu ayrılığa təəssüflənir. Bəli, mən bu sətirləri qələmə alana qədər Rusiya klubu rəsmi açıqlama verməyib və Kadinin keçidi “Krasnodar” tərəfindən elan edilməyib. Amma bizim etibarlı mənbəmiz “Qarabağ”dı. Bizimkilər artıq prosesin yekunlaşması barədə rəsmi məlumat yayıb. Deməli, “Krasnodar”la müqavilənin bağlanması da zaman məsələsidi. Azarkeşlər, eləcə də Qurban Qurbanov bu gedişlə barışmalı, Kadisiz “Qarabağ”ı görməyə hazır olmalıdı.

Zaman bütün yaraları sağaldır, ayrılıqlar unudulur. Şablon bir deyimdə deyildiyi kimi, nə əvəzedilməz insan var, nə də yeri doldurulmayacaq futbolçu. Qurban Qurbanov da illərini futbola, xüsusən də “Qarabağ”a verən bir mütəxəssis kimi bu reallıqların fərqindədi. Özü də yaxşı başa düşür ki, Kadinin gedişiylə onun əlinin altındakı heyətdən önəmli bir fiqur, az qala “sehirli çubuq” dəyərində futbolçu əskiləcək. Amma dünyanın sonu deyil. Ən azı ona görə ki, işin maliyyə tərəfi bu ayrılığı qaçılmaz edirdi. Azərbaycan premyer-liqasından heç də hər gün 5 milyon avroya futbolçu satmaq mümkün olmur. Bir futbolçunun gedişiylə “Qarabağ”ın büdcəsi məhz bu qədər zənginləşəcək. Azərbaycan standartları üçün yetərincə böyük məbləğdi. Unutmaq lazım deyil ki, Kadi məhz “Qarabağ”da səviyyəsini artırdı, bu boyda paraya dəyəcək futbolçuya çevrildi. Hesab edək ki, həmin o 5 milyon avro da Kadinin “Qarabağ”a təşəkkürü, Qurban Qurbanova “sağ ol”udu.

Azərbaycan premyer-liqasında ilk iki dövrə başa çatıb. “Qarabağ” keçirdiyi 18 oyunun heç birində məğlub olmayıb. Əsas rəqiblərlə oyunlarda da “köhlən atlar” öz səviyyəsini ortaya qoyub, çempionluğa ən real və ciddi namizəd olduğunu isbatlayıb. “Neftçi”ylə “Sabah”ın cızdığı qeyri-sabit qrafik də onu deməyə əsas verir ki, onlar “Qarabağ”ı büdrədəcək, növbəti çempionluğunu əngəlləməyi bacaracaq gücdə deyil. Hazırda “Qarabağ” “Sabah”ı 7, “Neftçi”ni isə 12 xal qabaqlayır. Yetərincə ciddi fərqdi və hazırkı səviyyə fərqi ondan xəbər verir ki, bu uçurum qışdan sonra daha da dərinləşəcək. Deməli, “Qarabağ” Kadisiz də liderliyini davam etdirmək, mövsümün sonunda Azərbaycan çempionluğunu bayram etmək əzmindədi. O ki qaldı avrokuboklara... Bu acı həqiqəti söyləmək nə qədər çətin olsa da, onu qəbul etməliyik. Hazırkı şəraitdə bir Azərbaycan təmsilçisinin avrokuboklarda gedəcəyi yol elə qrup mərhələsi səddini aşmaqdı. Acı təcrübə onu sübut edir ki, bəzən güclü olmaq belə “qara qüvvələr”i yenmək üçün yetərli olmur. “Qarabağ”a UEFA-nın əliylə atılan badalaqları unutmamışıq. İstər “İnter”lə Bakıdakı oyun olsun, istərsə də “Bazel”lə səfərdəki qarşılaşma. Deməli, aşağı-yuxarı “Qarabağ” bu mövsüm avrokuboklarda da üzərinə düşəni edib, hədəflərinə çatıb.

Könül istərdi ki, komanda Konfrans Liqasının yarımfinalına, lap elə finalına qədər getsin. Amma bütün bunlar bizim arzularımız və gerçək olmasını istədiyimiz ehtimallardı. Həyata real baxanda isə təkcə ehtimallara və arzulara görə 5 milyon avroluq təklifin üzərindən xətt çəkməyin doğru olmadığını düşünürsən. Bu məntiq də rəhbərliyin Kadinin satışına razılıq verməklə doğru addım atdığını deməyə əsas verir. Heç şübhəm yoxdu ki, “Qarabağ” bu gedişlə elə də zəifləməyəcək. Elə həmin o 5 milyon avro ilə gerçəkləşdiriləcək transfer və ya transferlər isə komandanın daha da güclənməsinə, yeni hədəflərə doğru irəliləməsinə xidmət edəcək!

AMAL