Sumqayıtdakı Mehdi Hüseynzadə adına şəhər stadionunun yenidən qurulması ilə bağlı təşəbbüsün kökləri 2019-un noyabrında gedib çıxır.

Məhz həmin vaxt Prezident İlham Əliyev dövlət büdcəsində nəzərdə tutulan ehtiyat fondundan Sumqayıt Şəhər İcra Hakimiyyətinə 5 milyon manat ayırdı. O pul bəs etmədi, sonradan bir neçə dəfə bu məsələ aktuallaşdı və Sumqayıt Bakıdan istədiyini aldı. Hətta Prezidentin məlum sərəncamında belə bir bənd də var idi:

Bu isə o demək idi ki, 2020-də stadionun yenidən qurulması bitəcək, qurğu istifadəyə hazır olacaq. Düzdü, araya müharibə girdi, koronavirus pandemiyası tüğyan etdi və s. və i.a. Amma bildiyimə görə, ötən ilin oktyabrından bəri stadion istifadəyə tam hazırdı. Hazırdı, amma istifadəyə verilmir.

Biz dəfələrlə stadion rəhbərinə bununla bağlı müraciət etmişik, ancaq tutarlı cavab ala bilməmişik. 8957 yerlik bu stadion nəzərə gəlib, yoxsa bilmədiyimiz və ictimaiyyətə açıqlanmasına ehtiyac duyulmayan hansısa səbəb üzündən sumqayıtlı futbolsevərlərin gözü yollarda qalıb? 2023-ün ilk günlərini yaşayırıq, ancaq “Mehdi Hüseynzadə”nin taleyi hələ də qaranlıqdı. Əfsanəvi partizanın adını daşıyan idman qurğusuna belə hörmətsiz münasibəti anlamaq və qəbul etmək çətindi. Görəsən, istifadəyə tam hazır olan stadionla bağlı hansı ciddi qlobal, bəşəri problem var? Ən yaxın günlərdə bu suala cavab tapacağımıza ümid edirik. Mehdi Hüseynzadənin narahat ruhu bu ləngimənin səbəbkarlarını bağışlayar yəqin...

ORXAN