Sumqayıtda tikilən yeni stadion hazır olmaq üzrədi.

Football-plus.az xəbər verir ki, 2019-cu ildə ölkə başçısının sərəncamı ilə şəhərdə Mehdi Hüseynzadə adına sadionun yenidən qurulması üçün dövlət büdcəsindən şəhər İcra Hakimiyyətinə 5 milyon manat ayrılmışdı. Bu müddət ərzində isə arena yenidən qurulmağa başladı. İşlər bir ara dayansa da, hazırda “Mehdi Hüseynzadə”də son tamamlama işləri gedir. Amma açılışın nə zaman olacağı ilə bağlı dəqiq bilgi yoxdu. Bu məsələyə noyabrın son günlərində aydınlıq gələcəyi deyilmişdi. Həmçinin stadionun dekabrın 24-də açılacağı ilə bağlı da xəbərlər dolaşır. Bu da ölkə başçısı İlham Əliyevin doğum günü ilə bağlıdı.

Bu məsələri dəqiqləşdirmək üçün Mehdi Hüseynzadə adına Sumqayıt şəhər stadionun direktoru Nadir Quliyevlə əlaqə saxladıq.

- Hazırda stadionda işlər nə yerdədi? Açılışa hazırlıq necə gedir?
- Hazırda tamamlama işləri gedir.

- “Sumqayıt” – “Qəbələ” matçına gələn əməkdaşımız stadionun qarşısında heykəllər qoyulduğunu görüb...
- Bəli, arenanın qarşısına iki futbolçunun heykəli qoyulub. Formal şəkildə seçilmiş oyunçulardı. Ayaqlarında top saxlayan futbolçuların heykəlidi. Çox gözəl də görüntüsü var, şəhər əhalisinin də xoşuna gəldi. Mehdi Hüseynzadənin heykəli isə əsas girişdə qoyulub.

- Açılışla bağlı dəqiq tarix məlimdu?
- Hələ dəqiq deyil. Məsələ ilə bağlı Prezident Administrasiyası ilə danışıqlar gedir. Təxminən nə vaxt olacağı haqda bir söz deyə bilmərik. Bu, icra başçısının təşəbbüsüdü.



- Arenanın Prezidentin doğum günündə, yəni dekabrın 24-də istifadəyə veriləcəyi deyilir...
- Xeyr, bunu hələ heç kim dəqiq deyə bilməz. Hələ tamamlama işləri gedir, yaxın 4-5 gün ərzində blinəcək. Bu üzdən heç kim dəqiq tarix deyə bilməz.

- Açılış mərasiminin Prezidentin doğum günündə olmasını istərdiz?
- Əlbəttə. Ola bilər ki, Prezidentin ad günü ilə yox, başqa tarixi gündə də olsun. Hələ bilinmir. Lakin Sumqayıtda stadionla yanaşı, başqa üç böyük obyektin də açılışı olacaq. Hər birinin də eyni zamanda istifadəyə veriləcəyi gözlənilir. Tarixlə bağlı bir söz deyə bilmərəm. Bu məsələ şəhər İcra Hakimiyyətinin öhdəsindədi.

- Sizcə, “Sumqayıt”ın cari çempionatdakı zəif çıxışı stadionun açılışına necə təsir göstərə bilər? Yəni bu məqam açılış zamanı izdihamın az olacağını deməyə əsas verir?
- Belə danışaq, hazırda başımız stadionun açılışı ilə bağlı məsələlərə qarışıb. Ona görə mən komandanın çıxışının buna necə təsir edəcəyini deyə bilmərəm. Açılışdan sonra bu sualı verərsiz, klubun prezidenti ilə bir yerdə cavablayarıq.

- Əhali sayına görə Azərbaycanın ən böyük ikinci şəhəri olan Sumqayıtın stadionunun tutumunun 10 min olması müəyyən iradlara yol açır. 400 minə yaxın əhalisi olan şəhərdə 10 minlik stadion həqiqətən kiçik sayıla bilər. Siz necə düşünürsüz? Stadionun tutumu şəhər üçün kifayət edəcək?
- Bu suala da cavab verə bilmərəm. Arenanın tutumu 10 mindi, açılış da belə olacaq. Niyə az olması isə bizimlə bağlı deyil. Mən stadionun direktoruyam, şəhərin rəhbəri deyiləm. Bu sualı da tam dəqiq şəhər rəhbərliyi cavablaya bilər.

ŞAİR ABDULLA