Rusiyalı şahmatçı Aleksandra Kostenyuk gələn ilin yanvarından İsveçrənin bayrağı altında çıxış edəcək.

Football-plus.az xəbər verir ki, bu haqda İsveçrə Şahmat Federasiyası məlumat yayıb:

Kostenyuk Rusiya ilə Ukrayna arasında müharibə başlayandan bəri vətəndaşlığını dəyişən ilk rusiyalı yüksək səviyyəli idmançı (həm qadınlar, həm də kişilər arasında) sayılır. Qeyd edək ki, qadın şahmatçı ötən ilin martında Rusiyanın Ukraynaya hərbi müdaxiləsini pisləyən açıq məktub imzalayıb.

Kostenyukun 38 yaşı var, qadınlar arasında şahmat üzrə 12-ci dünya çempionudu (2008-in sentyabrından 2010-un dekabrına kimi). Bundan başqa, ikiqat Rusiya çempionu, Avropa çempionu, milli komandanın tərkibində Şahmat Olimpiadalarının üçqat qalibidi. Qadın şahmatçı kişilər arasında da qrossmeyster adının sahibidi. İki dəfə də İsveçrə çempionatının qalibi olub.

Xatırladaq ki, Beynəlxalq Şahmat Federasiyası ötən ilin martında Rusiya və Belarus idmançılarına yalnız neytral statusda fərdi turnirlərə qatılmaq icazəsi verib. Onlar 2024-cü il yanvarın 1-dək FİDE bayrağı altında yarışa biləcəklər.