Bu ölkənin Futbol Federasiyası Kadi Borgesi “milliləşdirmək” istəyir - AÇIQLAMA
Dünən Azərbaycan futbolunda tez-tez rastlaşmadığımız hala rast gəldik.
"Qarabağ" əsas oyunçusu Kadi Borgeslə müqaviləni daha 3 il uzatdı. Braziliyalının "köhlən atlar"la hələ 2 illik müqaviləsi qüvvədə idi.
"20 nömrə" ilə belə uzunmüddətli müqavilə bağlamaq hansı zərurətdən irəli gəlib? "Football-plus.az" saytı olaraq bu suala aydınlıq gətirmək üçün menecerlərlə əlaqə saxladıq.
Tural Əsgərov: "Azərbaycanda, səhv etmirəmsə, son illər heç bir futbolçu ilə 5 illik müqavilə bağlanmayıb. Xatırlayıram, 7 il əvvəl "Qarabağ" Reynaldo ilə 4 illik müqavilə imzalamışdı. Özüm də həmin mərasimdə iştirak etmişdim. Amma 5 illik müqavilə Ağdam təmsilçisində ilk dəfədi. Əslində dünya futbolunda belə praktika çoxdu. Peşəkar klublar futbolçularla uzunmüddətli müqavilələr bağlayır. "Qarabağ"ın son illərdəki uğurunu nəzərə alsaq, klub Azərbaycan standartlarını çoxdan geridə qoyub. Komanda artıq tam şəkildə dünya futbolu ilə ayaqlaşmaqdadı. Kadiylə 5 illik müqavilə bağlanmasının əsas səbəbi xaricdən gələn cəlbedici təkliflər idi. Avropa klublarından ona 2,5-3 milyon avroluq təkliflərin ardı-arası kəsilmirdi. "Qarabağ" rəhbərliyi də bunu nəzərə alaraq, hazırda komandanın liderlərindən olan, hətta çəkinmədən əsas oyunqurucusu adlandıra biləcəyimiz futbolçuyla uzunmüddətli müqavilə imzaladı. Heç bir gözlənilmız hadisə baş verməsə, Kadi 5 il "Qarabağ"dadı”.
Təcrübəli menecer Filip Ozobiç kimi, gələcəkdə Abdulla Zubirlə Kadinin “milliləşdirilməsi” ehtimalına da toxundu:
"Zubirin Azərbaycan vətədaşı alması üçün hələ 1 il var. O vaxtda kimi də onun hansı formada olacağı, ölkəmizdə qalıb-qalmayacağı, AFFA-dakı dəyişikliklər, millinin “sükanı arxasında” kimin dayanacağı vacibdi. Bu suallara aydınlıq gələndən sonra nöqtə qoyula bilər. Kadiylə uzunmüddətli müqavilə bağlanmasında gələcəkdə onu millimizə cəlb etmək məqsədinin olduğunu indidən demək çətindi. Amma bir faktı deyim ki, "Lex"lə hər iki matçda sərgilədiyi perfirmansla nəinki xarici klubların, hətta bir çox ölkələrin Futbol Federasiyasının da diqqətini çəkdi. Polşa Futbol Federasiyasının seleksiyaçıları braziliyalının soyadının Malinovski olmasını nəzərə alaraq, onun Polşa əsilli olub-olmadığını araşdırıb, gələcəkdə milliyə cəlb etmək üçün işlərə başlamışdılar. Kadi indiki performansını qorusa və bir az da artırsa, Braziliya millisi xaric, bir çox ölkələr onu öz yığmalarında görmək istəyəcək. Ona görə braziliyanın gələcəkdə Azərbaycan millisinə cəlb olunması da mümkündü. Amma indidən konkret nəsə demək mümkün deyil".
Vaqif Heydərli:"Bizim kimi futbol ölkəsi olmayan dövlətlərdə 5 illik və daha uzunmüddətli müqavilə imzalanmasına nadir hallarda rast gəlinir. Amma futbolu inkişaf etmiş ölkələrdə belə müqavilələrin olması normaldı. Əslində futbolçunu yalnız yüksək oyunçu potensialına yox, həm də kollektivdəki nüfuzuna, çıxış etdiyi ölkənin qanunlarına, adət-ənənələrinə hörmətə və başqa nüanslara görə qiymətləndirirlər. Amma Kadi ilə sırf 5 illik müqavilə bağlanması yalnız yüksək performans sərgiləməsinə yox, xaricdən gələn cəlbedici təkliflərə görədi. Düşünürəm ki, "Qarabağ" Patrik Andrade məsələsindən yaxşı dərs çıxardı. Artıq özünü yaxşı tərəfdən göstərən futbolçuyla 1-2 illik yox, daha uzunmüddətli müqavilə bağlamaqla özlərini “sığortalayırlar”. İnanıram ki, Ağdam təmsilçisi bundan sonra da özünü yaxşı tərəfdən göstərən futbolçuları rahat buraxmamaq üçün uzunmüddətli müqavilələr bağlayacaq".
ABDULLA İSMAYILOĞLU
Digər xəbərlər
