Elnur Qənbərov: “Alesio 15 ildi komandada işləyir, hamı ona baş əyir”
2014/15 mövsümündə “Xəzər adaları” ilə ölkə çempionu olan Elnur Qənbərov uzun müddətdi Kanadada yaşayır.
Football-plus.az Futzal millimizin sabiq üzvü 2 gün öncə şəxsi “feysbuk” hesabında etdiyi paylaşımla diqqət çəkdi. O, “El Futzal” komandasının “sükanı arxasına” keçdiyini izləyiciləriylə bölüşdü.
Bunu nəzərə alaraq Elnur Qənbərovdan məsələnin məğzini öyrəndik:
“Bu klubun təsisçisi mənəm. Mənimlə birgə burda üç məşqçi də işləyir. Onlardan biri hamımızın tanıdığı, futzal millimizin sabiq üzvü Vahib Xocayevdi. Həmçinin əvvəllər “Neftçi”nin baş məşqçisi olan Aleksandr Dereberin də bizimlə çalışır. Hazırda akademiyamızda 25-30 uşaq var. Onlara futzalın sirlərini öyrətməyə çalışırıq. Bundan əlavə, mən FCT-da da işləmişəm. Orda da U-12, U-14, və U-21 komandaları ilə “Ontario cup”un qalibi olmuşam. Həmçinin əsas komanda ilə ikinci yeri tutmuşuq”.
Maraqlıdı, Qənbərovun “Araz-Naxçıvan”ın Çempionlar Liqasındakı çıxışına münasibəti necədi? Gənc mütəxəssisi dinləyək:
“Araz-Naxçıvan”ın çıxışını bərbad sayıram. Bunu tək mən yox, hamı deməlidi. Lakin hamı həmişəki kimi ağsına sul alıb oturur. İstər veteranlar, istərsə də məşqçi demək olarsa, məşqçilər hələ də varsa, bu barədə danışmalıdı. Alesio 15 ildi komandada işləyir, hamı ona baş əyir. Yalan deyirəmsə, biri çıxıb qəzetiniz vasitənizlə cavab versin ki, Elnur, səhv deyirsən. Baş katib deyir ki, ona şans veririk. Artıq 7-8 ildi şans verilir. Mən dəfələrlə federasiya prezidenti ilə görüşmək istədim. Bakıda olanda zəng edərək əlaqə saxlamağa çalışdım. Lakin hər dəfə bir vaxt deyərək sonda görüşməkdən imtina etdilər. AFFA-nın baş katibi Sərxan Hacıyevlə görüşə bildim. Sağ olsun, bildi ki, Bakıdayam, məni çağırdı, qəbul etdi. Amma Futzal Federasiyası belə etmədi. Sanki heç mənim kimi oyunçu, məşqçi olmayıb... Nəticəyə gəlincə, 9 legioner, 2 məşqçi köməkçisi ilə sonuncu oldular. Buna nə ad vermək olar? Deyirlər ki, seçmə mərhələ oyunlar var. Guya İspaniya, Rusiya, Portuqaliya, İtaliya, Qazaxıstan kimi nəhənglərdən qorxurlar. İndi Polşanı məğlub edəcəklər. Deyəcəklər ki, hər şey yaxşıdı. Ayına da 10 min dollar verəcəklər ki, işinə davam et. Hamı da haqq qazandıracaq ki, nəticə verib. Alesioya sual verən yoxdu ki, sən Braziliyadan qapıçı gətirirsən, amma əsas oyuna cavan, təcrübəsiz qapıçını buraxırsan. Nə qədər ki, susacaqlar, belə də davam edəcək. Nəinki Alesio, bütün komanda dəyişməliydi. Mən məşqçiləri və rəhbərliyi nəzərdə tuturam. Amma həmişəki kimi, “buyur, əcnəbi, gəl otur yuxarı başda, biz heç nə bilmirik...” Sizdən xahiş edirəm ki, dediklərimi qarşı tərəfə də bildirin. Heç inandırıcı deyil, amma bəlkə mənə cavab vermək istəyərlər”.
ŞAİR ABDULLA
Digər xəbərlər
