Tərlan Əhmədov: "7-yə yaxın futbolçu komandadan göndəriləcək"
Misli premyer-liqasında 18-ci tura yekun vurulub.
"Zirə" "Kəpəz"lə bərabərə qalıb - 2:2. Oyundan sonra gəncəlilərin baş məşqçisi Tərlan Əhmədovun mətbuat konfransı keçirilib. Sizi mütəxəssisin fikirləri ilə tanış edirik:
"2022-ci ili qələbə ilə başa vurmaq istəyirdik. Çox ciddi hazırlaşmışdıq ki, heç olmasa bu oyunda qalib gələk. Dramatik oyun keçdi. Bunlar hamısı futbola gözəllik bəxş edir. Hər iki komanda qələbə istəyirdi. Yüz faizlik qol epizodlarımız var idi. Bəzilərindən yararlana bilmədik. Sayılmayan qolumuz oldu. Komandama təşəkkür edirəm. Sona qədər mübarizə apardıq. Son turlarda yaxşı çıxış edirik. Bu gün də yaxşı oynadıq. Futbolun yazılmayan qanunları var. Onları qəbul etməliyik. Bəzən Çempionlar Liqasında da bir komanda 2 qol vurur, fasilədən sonra 3 top buraxır. Azlıqda qalan rəqibə qarşı arxayınlıq yarandı. Hər şeyə baxmayaraq, futbolçulara təşəkkür edirəm. Son 12 oyunda hansısa irəliləyiş əldə edə bildik. Kollektiv oyuna üstünlük veririk. Qışdan sonra bunun bəhrəsini daha yaxşı görəcəyik".
- Son dəqiqə qolu zamanı hansı hisləri keçirdiz?
- Ani hiss keçirirsən. Bu, sözlə ifadə olunmur. Əvvəllər çox həyəcan keçirirdim, aqressiv olurdum. Sonradan baxdım ki, bir az yanaşmamı dəyişməliyəm. Can da mənim canımdı. Bir neçə komandada nəticə verdim və yola salındım. Ani hiss gəldi. Düşünürdüm ki, biz qalib gəlməli idik. Qismətə bu yazılmışdı. Təbii qarşılamalıyam. Sayılmayan qolda keçirdiyim hiss buraxdığımızda olandan çox idi. Həyatdı. İrəli baxmalı, inkişaf etməliyik. “Kəpəz”in adını qaytarmalıyıq.
- Gedənlər, gələnlərlə bağlı nələr dəqiqləşib?
- Yola salınan futbolçular açıqlanacaq. 7-yə yaxın futbolçudu. Yolları açıq olsun. Hamısına uğurlar arzulayırıq. Bir neçə futbolçu ilə danışıq gedir. Ayın 7-dən sonra təlim-məşq toplanışımıza qoşula bilərlər. Hücum xəttini gücləndirmək üçün əcnəbi futbolçularla danışıqlar gedir.
- Əli Səmədov əsas komandaya qayıdacaq?
- Oyunları izləmişəm. Ola bilər ki, bizimlə Antalyaya getsin. Komandaya xeyir verəcək futbolçuların üzərində işləyirəm. Aqressiv, istəkli futbolçuların daha çox olmasını istəyirəm. Danışıq apardığımız futbolçularla məsələnin dəqiqləşməsindən çox şey asılıdı. Bəzi oyunçuların getməsinə isə artıq qərar vermişəm.
- Gəncləşdirmə apardığınızı deyirsiz. Ən yaşlı futbolçularınızdan Tural Axundov qalacaq?
- Bəli, gəncləşdirmə aparırıq. O mövqeyə bir neçə futbolçuya baxırıq. Komandaya ürəyi yanan bir lider lazımdı. O, komandanın daxilində olmalıdı. Meydana çıxıb-çıxmaması şərt deyil. Artıq Turalla rəqabət aparacaq futbolçu lazımdı. Hazırda belə oyunçu yoxdu. Bir 2005-ci il təvəllüdlü oyunçumuz var. Amma hələ təcrübə qazanmalıdı. Turalın kollektivdə olması vacibdi. Heç olmasa, bir yaşlı futbolçunun olması lazımdı.
- “Kəpəz”in büdcəsi aşağıdı. Göndərmək istədikləriniz getməsələr, yeni oyunçular necə cəlb edəcəksiz?
- Təşkilati məsələlərə mən cavabdeh deyiləm. Bu şeylərə qarışmıram. Bunlar rəhbərliyin işidi. Bir neçə mövqeyə futbolçu alınmalı olduğunu demişdim. Biz də başa düşürük ki, kimsə getməyə razılaşmaya bilər. Belə hadisələr olur. Amma bu, mənim işim deyil. Hamımız komandanı gücləndirməyə çalışmalıyıq. Qışdan sonra bu heyətlə uğur qazanmaq çətin olacaq. Yeni nəfəs, yeni qan lazımdı.
- Demək olar ki, şans qazanmayan Kamran İbrahimov da yola salınacaq?
- Gedənlər açıqlanacaq. Bu gün Orxan Sadıqlı qapıda inamlıdırsa, hansı məşqçi başqasını oynadar? O, əvəzedici heyətin oyunçusu idi. Biz onu bu formaya gətirdik. İndi elə məvacib alır ki, onu deməyə dilim gəlmir.
Digər xəbərlər
