Argentinalı superstar Lionel Messi DÇ-2022-dəki məlum uğurundan sonra “instaqram”da fırtına kimi əsməkdə davam edir.

Football-plus.az xəbər verir ki, Messi onsuz da mundiala qədər də dünyanın ən tanınmış simalarından biri idi. Amma Argentina yığması ilə dünya çempionluğunu qazanması və faktiki futbol Tanrısı səviyyəsinə yüksəlməsi onun populyarlığını inanılmaz səviyyəyə qaldırıb. Ötən sayımızda Leonun DÇ-də qələbəyə həsr olunmuş paylaşımının Krişitiano Ronaldonun paylaşımını geridə qoyduğunu və 47 milyondan çox “layk” toplamaqla “instaqram”da idmançılar arasında yeni bir rekord müəyyənləşdirdiyini xəbər vermişdik. Onu da qeyd etmişdik ki, Messinin həmin paylaşımı “layk” sayına görə “instaqram”da yalnız bir şəkildən – adi bir yumurta şəklindən geri qalırdı. Həmin şəkilin xüsusi bir tarixçəsi var.

Belə ki, “world_record_egg” səhifəsi 2019-cu ilin yanvarında yarızarafat, yarıciddi şəkildə qarşısına rekord qırmağı hədəf qoydu. O vaxt “instaqram”da bu baxımdan rekord Kardaşyan ailəsinin bir üzvü olan Kayli Cennerin 18 milyon “layk” toplayan bir şəklinə məxsus idi. “Dünya rekordu yumurta” mənasını verən “world_record_egg” səhifəsi isə bir yumurtanın şəklini paylaşaraq altdan “gəlin, birlikdə dünya rekordu qıraq və Kayli Cenneri geridə qoyaq” ifadəsini yazdı və populyarlığını artırmağa başladı. Həmin tarixdən bəri, demək olar ki, 3 il ötüb. İndi bu yumurta səhifəsinin 4,9 milyon təqibçisi var. Şəklin özünü isə 56 milyon adam “layk” eləmişdi. Amma Messi ilə bağlı məsələ populyarlıq qazandıqdan sonra aləm bir-birinə dəydi. Messisevərlər həmin yumurta şəklinə qoyduqları “laykları” yığışdırmağa, Ronaldosevərlər isə əksinə, ora “layk” qoymağa başladılar. Amma Messinin DÇ-də qələbəyə həsr olunmuş 10 şəkildən ibarət paylaşımı artıq elə bir populyarlıq qazandı ki, onun qarşısında durmaq çətin oldu. O paylaşım, ümumiyyətlə, mümkün olan bütün rekordları alt-üst etdi: 39 dəqiqəyə 10 milyon “layk”, 1 günə 50 milyon “layk”!

Hazırda isə “layk” sayı 70 milyona çatmaq üzrədi! Ümumiyyətlə, Leonun tarixi zəfərdən sonrakı şəkilləri inanılmaz sürətlə bəyənilir. Məsələn, onun dünya kuboku ilə birlikdə çarpayısında çəkdirdiyi şəklə də bir gün ərzində az qala 50 milyon “layk” gəlib. Başqa sözlə desək, indi “instaqram” tarixində ən çox “layk” toplayan 20 şəkildən 8-i (!) Messiyə məxsusdu. Leonun qıra bilmədiyi cəmi bir rekord qalıb. “İnstaqram”da onun təqibçi sayı 406 milyon, Ronaldoda isə 520 milyondu.

Yeri gəlmişkən, bu mövzü ilə bağlı bir maraqlı məqami da diqqətinizə çatdıraq. Leonun sabiq klubu “Barselona” öz rəsmi “instaqram” səhifəsində onun mundialdakı zəfərinə aid artıq 9 paylaşım edib! Kataloniya nəhənginin rəsmi “tvitter” səhifəsi isə bununla bağlı 8 paylaşım edib. Halbuki Messinin hazırda şərəfini qoruduğu PSJ-nin rəsmi “instaqram”ında Messinin uğuruna həsr olunmuş cəmi 5 paylaşım görmək olar. Başqa sözlə desək, “Barselona” Messinin uğurunu PSJ-dən daha çox diqqətdə saxlayır. Digər tərəfdən finalda məhz Fransa yığmasının uduzduğunu nəzərə alsaq, bu məqam təəccüb doğurmamalıdı.