“Sumqayıt” və “Məmmədyarovlar” Şahmat Məktəbinin birgə təşkilatçılığı ilə “Kapital Bank Arena”da akademiyamızın məşqçi və futbolçu heyəti arasında (U-10-dan U-19-dək) şahmat turniri keçirilib.

Football-plus.az xəbər verir ki, növbəti aylar ərzində ənənəvi olaraq keçirilməsi planlaşdırılan ilk yarış günündə akademiyamızın 18 üzvü iştirak edib.

Turnirin keçirilməsində əsas məqsəd, futbolla şahmatın vəhdətini təşkil etməklə yanaşı gənc futbolçuların taktiki düşüncələrini inkişaf etdirməyə zəmin yaratmaqdır. Yarışı “Sumqayıt”ın prezidenti Riad Rəfiyev, A komandanın baş məşqçisi Samir Abasov da izləyib. Yekunda “Məmmədyarovlar” Şahmat Məktəbinin rəhbəri, şahmat üzrə beynəlxalq dərəcəli qrossmeyster Zeynəb Məmmədyarovaya simvolik klubun idman geyimi təqdim edilib.

Qeyd edək ki, “Sumqayıt” ilə “Məmmədyarovlar” Şahmat Məktəbi arasında əməkdaşlığa əsasən, həftənin müəyyən günlərində akademiyamızın gənc futbolçularına xüsusi olaraq şahmat dərsləri keçiriləcək.