Şəhriyar Əliyev: “Ayxan Abbasov nə desə, o da olacaq”
Şəhriyar Əliyev: “Ayxan Abbasov nə desə, o da olacaq”
“2 gündü ki, fərdi məşqlərə başlamışam. Şükür allaha ki, hər şey yaxşıdı. Zədələndiyim yerdə ağrı hiss etmirəm. Amma futbolçu bədəni bir az fərqlidi. Məşqçi qalanda formadan düşür. Baş məşqçimizin qərarını gözləyirəm. Şans verəcəksə, əlimdən gələni edəcəm ki, komandama kömək edim. Ayxan Abbasov nə desə, o da olacaq. “Zirə” ilə matçdan öncə də bu barədə danışığımız oldu. Mənə dedi ki, zədən tam sağalsın, sonra oynamağa başlayarsan. Amma özümü yaxşı hiss edirəm. 2-3 gündü ki, qaçıram. Düzdü, oyunla məşq ayrıdı. Amma özümü normal hiss edirəm”.
Bu sözləri “Football-plus.az”a açıqlamasında Şəhriyar Əliyev deyib. “Turan Tovuz”un müdafiəçisi zədəsi ilə bağlı danışıb. “Boz qurd”un kapitanı Azərbaycan kubokunda “Kəpəz”lə qarşılaşacaqları matçı da şərh edib:
“Bizi çətin oyun gözləyir. Bu yarış 2 görüşdən ibarətdi. Düzgün oynamaq lazımdı. Baş məşqçimiz rəqibi təhlil edib. Necə oynamağın lazım olduğunu bizə izah edib. Səfər matçından sərfəli nəticə ilə dönmək istəyirik. Düzdü, zədəlilərimiz var. Amma bu, bəhanə olmamalıdı. Meydana çıxanların hamısını sona kimi mübarizə aparacaq. Bu, derbidi. Hamı qarşılaşmanın vacibliyini anlayır. Düşünürəm ki, rəqib də bizə qarşı yaxşı hazırlaşıb. Ümid edirəm ki, qələbə qazanaraq azarkeşlərimizi sevindirərik”.
İLKİN SULTANLI
