"İki cütün taleyi demək olar ki, bəllidi. Amma düşünürəm ki, dünya çempionatında qeydə alınan son nəticələrdən sonra Azərbaycan kubokunun 1/4 finalında da sensasiyalar yaşana bilər. "Qarabağ" - "Qəbələ" duelində böyük ölçüdə üstünlük ağdamlıların tərəfindədi. Qurban Qurbanovun son dönəmlərdə gileyləndiyi yorğunluqdan əsər-əlamət qalmayıb. Bu, "Neftçi" ilə oyunda göründü. Halbuki, bizdə kubok və çempionat oyunları arasında bərpa üçün yetərincə vaxt mövcuddu. Amma komanda daxilində olan vəziyyəti məşqçilər heyəti daha yaxşı bilir. Məncə, hər kəs tərəfindən qəbul olunar ki, "Qəbələ"nin şansı "Qarabağ"a nisbətdə daha azdı.

"Səbail"in isə son durumunu və nəticələrini nəzərə alsaq, "Sabah" göstərdiyi performansla daha üstün görünür. Lakin "bayquşlar" "Şamaxı"yla heç-heçə etdikləri görüşdə olduğu kimi boşa verilən imkanları yenə havaya sovursa, Mahmud Qurbanovun komandası əlinə düşən fürsətlərdən istifadə edərək mərhələ adlaya bilər. Amma düşünürəm ki, Murad Musayev bu matçlardan lazımi nəticələri çıxarıb. Çünki kubok oyunları fərqli ab-havada keçir. Burda bütün komandalar toparlanıb nəticəyə fokuslana bilər.

"Zirə" - "Neftçi" qarşılaşması da maraqlı olacaq. Qəsəbə təmsilçisi "ağ-qaralar" üçün əvvəlki illərdə də olduğu kimi çox çətin rəqibdi. Kubokda da bir neçə dəfə qarşılaşıblar. Nəzərə alsaq ki , artıq "Neftçi" üçün demək olar ki, çempionluq şansı bitib, komanda ən yaxşı halda kuboku qazanaraq, çempionatın nəticəsini unutdurmağa çalışacaq. "Zirə" isə premyer-liqa oyunlarına diqqətini daha çox ayırıb. Klubun məşqçisinin həmişə heyətlə bağlı gileylərini nəzə alsaq, üstünlüyü ölkə çempionatına verəcəyini təxmin etmək olar.

Kubokun ən maraqlı görüşü qərb derbisi olacaq. Bu komandalar arasındakı oyunlar maraq dərəcəsinə görə "Neftçi" - "Qarabağ" görüşündən heç də geri qalmır. Burda Tərlan Əhmədovlu "Kəpəz"i görəcəyik ki, son turlarda komanda daha baxımlı çıxış edərək Gəncə təmsilçisi üçün çempionatda hələ heçnəyin bitmədiyini göstərir. Mübariz və sona qədər ümidli komanda görürük. "Turan Tovuz"a gəldikdə isə bu kollektiv daha çox ikinci nömrəylə oynayıb əks-hücumlarda rəqibləri cəzalandıra bilir. Onların əksinə "Kəpəz" Tərlan Əhmədovun gəlişindən sonra dominant futbol oynamağa çalışır. Bu səbəbdən "Turan Tovuz" öz oyun üslubuna sadiq qalacaq və əks-hücumlarının vaxtını gözləyəcək".