Bildiyiniz kimi, “Səbail” ardıcıl 7 turdu ki, qələbə qazana bilmir. Bakı klubu qalibiyyətə həsrətdi.
Dünən komandanın kapitanı ilə bu haqda söhbətimiz oldu. Rahid Əmirquliyev vəziyyəti düzəltmək istədiklərini dilə gətirdi.
“Gəmiçilər”in nə üçün bu durumda olduğunu öyrənmək üçün baş məşqçi Mahmud Qurbanovla əlaqə saxladıq. Ürəyi dolu olan 49 yaşlı mütəxəssis “Football-plus.az”a açıqlamasında “Qəbələ”yə 1:2 hesabı ilə uduzmaqlarının səbəbini açıqladı. Bundan əlavə, hakimlərin onun komandasına qarşı qərəzli olduğunu dilə gətirdi:
“Qəbələ” ilə oyun maraqlı keçdi. İlk dəqiqələrdə üstünlük bizim tərəfimizdə idi. Qol vurduq. 9-cu dəqiqədə Kizito yerdə qaldı. Məncə, VAR-a baxaraq penalti vermək olardı. Əfsuslar olsun ki, həmişəki kimi hakimlər lehimizə olan məqamları görməzdən gəlirlər. Belə şeyləri heç vaxt nəzərə almırlar. Bu ilk dəfə deyil. Bir neçə oyunda da belə olub. Bu epizoddan sonra rəqib hesabı bərabərləşdirdi. Hər iki komanda da yaxşı oynadı. Sürətli matç izlədik. Qələbə qazanmaq istəyirdik. Amma alınmadı. Lakin ikinci qol vurulan zaman top rəqibin əlinə dəymişdi. Bizim futbolçu topu uzaqlaşdırmaq istəyirdi. Lakin top rəqibin əlinə dəyərək qabağına düşdü. Bunu görmək üçün fil eynəyi lazım deyildi. Hər şey açıq-aydın görünürdü. Ekran başında matçı izləyən tamaşaçılar belə topun ələ dəydiyini gördü. Hətta 5 dəqiqə VAR-a baxdılar. Görüşü yayınlayan “CBC Sport” kanalı epizodu bir neçə rakursdan göstərdi. Orda da bilindi ki, top açıq-aşkar rəqibin əlinə dəyib. Yenə deyirəm, əsas hakimlə VAR-dakılar 5 dəqiqə boşuna vaxt apardılar. VAR hakimi haqda isə danışmaq lazım deyil. “Sabah”la matçda da penaltimizi verməmişdi. Mənə elə gəlir ki, bizdə təzə qərarlar icad olunub. Hakimlər bizə qarşı qərəzli mövqe sərgiləyirlər. Belə şeylərlə təkcə “Qəbələ” ilə oyunda yox, başqa matçlarda da rastlaşmışıq. Bu, qərəzdi, komandanı “sındırmaq”dı. Mən belə başa düşürəm. Bu qədər olmaz. Biz qol vuranda və ya lehimizə penalti veriləndə VAR-a baxılır, nəsə axtarılır. Rəqibdə olanda isə veclərinə almırlar. Baş hakim bütün məsuliyyəti öz üzərinə götürür. Hakimlik barədə düşünmək lazımdı. Bu qədər qərəzli qərarlar verilməməlidi. Bunun başqa adı yoxdu. İkinci qolda topun ələ dəydiyini görmək üçün lupaya ehtiyac yox idi. Həmin oyunda komandamız məğlubiyyətə layiq deyildi. “Qəbələ”nin ikinci qolunda ötürmə zamanı top Asif Məmmədovun əlinə dəymişdi. Amma VAR hakimi fərqli düşüncədə idi. O da ki, Rauf Cabbarov idi. “Sabah”la oyunda da bizim təmiz penaltimizi verməmişdi. Topun ələ dəydiyini görmək üçün hansısa istedad lazım deyil. “Turan Tovuz”la səfər oyununu xatırlayın. Həmin matçda lehimizə penalti verilmişdi. Sonra VAR-a baxdılar və qərarı ləğv etdilər. Topun Ağabalanın əlinə dəydiyini iddia etdilər. “Neftçi” ilə matçda penalti epizodunda top ələ dəydi. Onda da dillənmədik ki, həqiqətən də belə olub. Amma burda epizodu görməməyin başqa adı yoxdu. Düşünürəm ki, hakimlər bizim xeyrimizə olan hadisələri görmək istəmirlər. Nümunələr çoxdu. Buna son qoyulmalıdı. Bu qədər olmaz. Susuruqsa, acizliyimizdən deyil. Bilmirik ki, hakimlər cəzalananda nə olur. Komitənin qərarından xəbərimiz olmur. Bizə bununla bağlı nəsə demirlər. Görəsən, Hakimlər Komitəsi belə şeylərə nəzarət edir? Bu da sual doğurur. VAR yaxşı şeydi. Amma hakimlər ədalətli olmalıdı. Referi səhv edəndə "insandı" deyirik. Amma düşünmürük ki, onun qərarına görə nə qədər adam əziyyət çəkir. Birhəftəlik əziyyətimiz hakimə görə hədər olur. Məşqçilərin, futbolçuların, azarkeşlərin insani hissləri ilə oynayırlar. Bir nəfərə görə nə qədər adam əziyyət çəkər? Bu hadisələr 1 oyunda olsa, deyərik ki, təsadüfdü. Amma proseslər ardıcıl matçlarda təkrarlanır. Biz susduqca bunlar daha da üstünə qoyurlar. Hakimlərlə bağlı ölçü götürülməlidi. Sərt qərarlar verilməlidi. Cəzalandırılmalıdılar. Belə şey ola bilməz. Dünya futbolunda ilk dəfə idi ki, autdan ofsayd qeydə alırdılar. Hansı ki, biz onda son hücuma çıxırdıq. Bəlkə qol vuracaqdıq? “Neftçi” ilə oyunda futbolçumuza yersiz sarı vərəqə verdilər. Bu səbəbdən də Qustavo “Qəbələ” ilə oyunu buraxdı. Əvvəllər bunları danışmırdıq. Abır-həya edirdik. Amma susduqca vəziyyət daha da çətinləşir və qəlizləşir. Bizim oyunlara təyinat alan hakimlər sanki qaydaları bilmirlər. Ya da ki, Hakimlər Komitəsi təzə qərarlar kəşf edib. Hamı deyir ki, hakimlər ədaləti bərqərar edir. Amma bizə qarşı heç bir ədalətli qərarlar verilmir”.
İLKİN SULTANLI