Ayaz Quliyevlə bağlı "Neftçi"ni sevindirəcək XƏBƏR

Bir neçə gün öncə "Neftçi"nin Ayaz Quliyevlə maraqlandığını xəbər vermişdik.

Rusiya mətbuatının yazdığı xəbərə görə, flaqman yarımmüdafiəçi üçün 300 min avro ödəmək niyyətindədi. Lakin "Ximki" 500-700 min avro tələb edir.

Məsələ ilə bağlı redaksiyamıza maraqlı məlumat daxil olub. Football-plus.az xəbər verir ki, 26 yaşlı futbolçu "Ximki"də xoşbəxt deyil. O, premyer-liqa klubundan ayrılmaq niyyətindədi. Bunun 2 səbəbi var: komandanın çempionatın 15-ci pilləsində qərarlaşması və maliyyə problemlərinin olması.

"Ximki" 2 aydı ki, futbolçuların maaşını vermir. Bundan əlavə, mövsümün əvvəlindən aylıq ödəmələrdə 10-15 gün gecikmə olur.

Məhz bu səbəblərdən Ayaz Quliyev qışda "Ximki"ni tərk etmək niyyətində olduğunu menecerlərinə bildirib.

Qeyd edək ki, yarımmüdafiəçi bu mövsüm premyer-liqada 10 matçda meydana çıxıb və 1 məhsuldar ötürmə ilə yadda qalıb.

İLKİN SULTANLI