Misli premyer-liqasında 15-ci turun “Neftçi” – “Səbail” (3:1) oyunundan sonra təşkil edilən mətbuat konfransında meydan sahiblərinin baş məşqçisi Laurentsiu Regekampf jurnalistlərin suallarını cavablandırdı.

"Football-plus.az" xəbər verir ki, o, əvvəlcə matç barədə fikirlərini bildirdi...

- Pozitiv andı ki, 3 xal qazandıq. Yaxşı başladıq və ilk hissədə oyuna nəzarət etdik. Bəzi epizodlarda çox inamlı idik. Bəzən isə tempi dəyişib, daha sürətli oynayaraq qollar vurmalıydıq. İkinci yarıda yenə fərqləndik. Amma sonrakı 10 dəqiqə faciəvi şəkildə keçdi. Qol vurmaq şansımız var idi, amma özümüz top buraxdıq. 10 dəqiqə ərzində heç nə edə bilmədik. Beləliklə, rəqibə 2-3 böyük şans yaratmaq imkanı verdik. Bu, baş verməməlidir. Komandada kifayət qədər təcrübəli və səviyyəli oyunçular var. Yaxşıdır ki, 3 xal qazanmış olduq.

- “Səbail” səvlərinizi bağışıladı, amma növbəti rəqibiniz “Qarabağ” bağışlamayacaq. Müdafiədəki boşluqlar nə vaxt düzələcək?

- Doğrudu, “Qarabağ” belə səhvləri bağışlamır. Ancaq eyni anda da deyərdim ki, futbolçularımız növbəti matçda belə epizodlarda daha peşəkar davranacaqlar. Onlar belə səhvlər etməməlidilər. Müdafiədə problemlərimiz var. Stankoviç zədəlidi. Solomon Kvirkveliya və Azər Salahlı milli komandadan gəlib. Mbodj 10 gün məşq etməyib. Belə amillər təsir göstərir. Sabahdan növbəti matçın hazırlığına başlayacağıq. İnanıram ki, futbolçularım daha inamlı, yaxşı oynayacaqlar.

- “Qarabağ”la oyun öncəsi nəticə üçün hansı planınız var?

- Əlbəttə, hər zaman oyun 0:0-la başlayır. Hər iki komandanın eyni şansı olur. Siz görürsüz ki, futbolda hər şey mümkündü. Çox yaxşı hazırlaşmalı, gücümüzə inanmalıyıq. Bu cür yanaşsaq, şanslarımız olacaq.

- Mert Çelikə şans verməməyiniz nə ilə bağlıdı?

- Zədədən yeni qayıdıb. 3-4 həftə məşq etmədi. Ona da şans verəcəyik. O zaman ki hazır olduğunu görək. Mertin şansı olacaq.

- Ağadadaş Salyanski əsas komandada debüt etdi. Onun oyunu barədə nə deyə bilərsiz?

- Gənc oyunçudu. Qaçışı, bədən quruluşu, oyuna yanaşmasını çox bəyənirəm. O da “Neftçi”nin gələcəyidi. Çalışıram, əvəzedici heyətdən əsas komandaya oyunçular cəlb edim və şans verim. Belə olan halda onların özlərinə inamı artır. O, üzərində işləməli və əsas heyətə düşməyə çalışmalıdı.