Həftəsonu, daha dəqiq desək, noyabrın 26-da minifutbol üzrə 2022/23 mövsümünün ilk turu keçiriləcək. Turnirə 17 komandanın qatılacağını ötən saylarımızın birində xəbər vermişdik.

Football-plus.az olaraq çempionatın startı ərəfəsində daha ətraflı bilgi əldə etmək, bizi maraqlandıran suallara cavab tapmaq üçün Minifutbol Federasiyasının mətbuat katibi Sərxan İbrahimoğlu ilə əlaqə saxladıq.

- Yeni mövsümdə 17 komanda mükafatlar uğrunda mübarizə aparacaq. Niyə məhz 17? Komanda sayını cüt etmək bu qədər çətin idi? Ümumiyyətlə, iştirak üçün müraciət edənlərin sayı çox idi?
- Yarışın adı dəyişdirilib minifutbol üzrə Azərbaycan çempionatı olandan sonra turnirə qatılmaq üçün müraciət edənlərin sayı yetərincə çox idi. Təbii ki, burda millinin Slovakiyada keçirilən Avropa çempionatında qalib olmasının da xüsusi rolu oldu. Həmin uğurdan sonra minifutbolun populyarlığı bir qədər də artıb. Sözün düzü, 40-dan çox komanda çempionatda iştirak etmək istəyirdi. Biz onların arasından maliyyə dayaqları möhkəm, məşq etmək üçün müəyyən şəraitə sahib olanları seçdik. Yəni seçim zamanı bizim tələblərə cavab verənlərə üstünlük verdik. Bu say 18 də ola bilərdi. Ancaq ən yaxşıları seçdik. İştirakçı sayı 17 olsa da, ümid edirəm ki, maraqlı çempionata şahidlik edəcəyik.

- Komandalar çempionatda iştirak üçün federasiyaya ödəniş edir?
- Əvvəlki illərdən fərqli çempionata qatılan kollektivlər ödəniş etmir.

- Təşkilati işlər necə gedir? Oyunlar harda keçiriləcək, hakimlik məsələsi necə tənzimlənəcək, yayın təşkil olunacaq?
- Oyunlar “Asfar” Şirkətlər Qrupuna daxil olan stadionlarda keçiriləcək. Canlı yayınla bağlı danışıqlar gedir. Ola bilər ki, hər turda 2-3 görüş canlı yayınlansın. Qarşılaşmaları ölkənin tanınmış hakimləri idarə edəcək. Bununla bağlı AFFA-ya müraciət olunub və məsələ həllini tapıb. Bir sözlə, çempionata tam hazır olduğumuzu deyə bilərəm.

- Çempionata qatılan komandalar arasında bölgə təmsilçiləri də var. Görüşlərin bölgələrdə keçirilməsi nə dərəcədə realdı?
- Bu, Azərbaycan çempionatı adı altında ilk yarışımızdı. İlk olduğundan bizim üçün həm təcrübədi, həm də test xarakteri daşıyır. Gələcəkdə hədəfimiz Azərbaycan çempionatının coğrafiyasını genişləndirmək, bölgələrdə də oyunlar təşkil etməkdi. Bu il çempionata bir neçə bölgə komandasını cəlb etməyimiz artıq uğur kimi dəyərləndirilə bilər. İndiyədək belə hal yaşanmamışdı. Növbəti illərdə işğaldan azad olunan rayonlarımızın təmsilçilərinin də ölkə çempionatında iştirakını təmin etməyi düşünürük.

- Əsasnamadə qalibin və ikinci pillənin sahibinin Çempionalar Liqasında, bürünc mükafatçının isə Avropa Liqasında iştirak edəcəyi qeyd olunub. Çempiona və ya mükafatçılar üçün əlavə pul mükafatı nəzərədə tutulub?
- Bəli, məhz belə olacaq. Qalib komandaya pul mükfatının verilməsi nəzərədə tutulmayıb. Əvəzində ilk yerin sahibinin Çempionlar Liqasında keçirəcəyi oyunların bütün xərcini federasiya qarşılayacaq. Bura nəqliyyat, otel, hətta qidalanma daxildi. İkinci və üçüncü yerin sahiblərinə də avrokuboklarda iştirak vaxtı müəyyən dəstək veriləcək.

- Komandaların heyətlərində kimlər oynaya bilər? Bu yöndə hər hansı limit, qadağa mövcuddu?
- Əsasnamədə peşəkar karyerasını bir il əvvəl başa vuran istənilən futbolçunun minifutbol üzrə ölkə çempionatında çıxış edən komandanın heyətində oynaya biləcəyi qeyd olunub. Gələcəkdə bu istiqamətdə də bəzi islahatlar aparılması nəzərdə tutulub. Ola bilər ki, müqaviləsinə xitam verilən istənilən peşəkar dərhal bizim çempionatda oynamaq hüququ qazana. Azarkeşlər gələcəkdə böyük futbolda tanınmış, ancaq fərqli səbəblərdən karyerasını erkən bitirmək məcburiyyətində qalan oyunçuları minifutbolda izləyə biləcək.

RƏŞAD