İTV nə üçün İngiltərə premyer-liqasının cəmi 2 oyununu göstərir? - AÇIQLAMA
Ötən il olduğu kimi, bu mövsüm də İngiltərə premyer-liqasının oyunlarını İTV yayınlayacaq.
Telekanal bununla bağlı dünən xəbər paylaşıb. Görəsən, bu dəfə hansı yeniliklər nəzərdə tutulub? Yenə iki maraqlı oyun təqdim olunacaq, yoxsa bu sayda artım var? İngiltərə kubokunun matçları da göstəriləcək?
Suallara İTV-nin İdman Departamentinin rəhbəri Kənan Hakimovla söhbətdə aydınlıq gətirdik:
“Ötən il olduğu kimi, İngiltərə premyer-liqasının oyunlarını yenə İTV yayınlayacaq. Ənənəvi olaraq hər həftə iki mərkəzi qarşılaşmanı təqdim edəcəyik. Sadəcə, 1-ci turda "Kristal Pelas" - "Arsenal" cütü açılış matçı olduğundan onu yayınlayacağıq. İkinci isə maraqla gözlənilən "Vest Hem" - "Mançester Siti" oyunu olacaq. Əksər futbolsevərlər bizdən daha çox matçın nümayişini istəyir. Onların istəyini başa düşürük, amma nəzərə almaq lazımdı ki, İTV idman telekanalı deyil. Bizim daha vacib verlişlərimiz olur. Ona görə də 2 matçdan çox və kubok oyunlarını yayınlaya bilmərik. Ötən ilə qədər bu çempionatını "İdman" TV göstərirdi. Heç kimin gözləmədiyi halda onlar yayın hüququnu almadılar. Deyə bilmərəm, hansı səbəbdən belə alındı. Hər halda, istənilən telekanalın öz siyasəti, məramı var. Uzun sözün qısası, İngiltərə çempionatı 6 tur yayınlanmadı. Bizim telekanala zənglərin, sosial şəbəkələrdəki hesablarımıza mesajların, əməkdaşlarımıza müraciətlərin sayı-hesabı yox idi. Məhz bu qədər azarkeşin xahişi və istəyini görəndən sonra 7-ci turdan İngiltərə premyer-liqasının yayınına start verdik. Onu da vurğulayım ki, dünya futbolunda 5 top-liqadan biridi. Onlar oyunların yayınından pul qazanırlar. Əksər ölkələrdə, o cümlədən də bizə yaxın olan Türkiyədə belə İngiltərə premyer-liqasının yayını pulludu. Yəni vətəndaşlar İngiltərə və başqa top-liqaları izləmək üçün ödəniş edirlər. Biz isə futbolsevərlərimizə oyunları təmənnasız çatdırırıq. Hətta adi antenlər vasitəsiylə də matçları izləmək olur. Gələcəkdə idman kanallarımızdan biri İngiltərə çempionatının matçlarının nümayişini öz üzərinə götürsə, buna, sadəcə, sevinər, estafeti onlara verərik".
ABDULLA İSMAYILOĞLU
Digər xəbərlər
