“Hazırda dünya çempionatından danışmaq bir qədər çətindi. Çünki top-komandalarda nəsil dəyişikliyi baş verdi. İspaniyada bəzi dəyişikliklər gerçəkləşdi. Avropa çempionu olan İtaliya mundiala vəsiqə qazana bilmədi. Avropada elə hallar baş verir ki, hansısa bir favoriti açıqlamağa çətinlik çəkirəm. Amma heyyətlərə baxdıqda Almaniya və Fransa favorit sayıla bilər. İspaniya da büdrəyə-büdrəyə gəlsə də, görünür, Luis Enrike öz oyun üslubuna sadiq qalır. Həmişə Braziliyanı da favoritlər sırasında görürdük. Bundan əlavə, Messili Argentina var. Heyətlərdə o qədər yeni futbolçular ortaya çıxıb ki, “Ronaldo, Messi dövrünü geridə qoymuşuq” da demək mümkündü. Messi bəlkə də özünü yaxşı tərəfdən göstərə biləcək. Bunu Ronaldoya da aid etmək olar. Lakin çox təəssüf ki, Holann kimi bir ulduzu DÇ-də görə bilməyəcəyik. İngiltərədən yaxşı nəticələr gözləyirdik, amma necə çətinlik çəkdiyini gördük. Belçika yaxşı heyətə malikdi, amma sabitlik yoxdu. Ona görə bu komandaları favorit adlandırmaqda çətinlik çəkirəm. Okeanın o biri tayı həmişə Avropaya nisbətən struktur baxımından axsayıb. Ona görə deyə bilrəm ki, mübarizə əsasən Avropanın top-milliləri arasında olacaq. Lakin mən Almaniyanı çempionluğa əsas namizəd görürəm. Dediyim bu nəsil dəyişikliyində Almaniya rəqiblərindən daha öndədi. Amma bu il Messi, özünün açıqladığı kimi, sonuncu dünya çempionatında iştirak edəcək. Buna görə ola bilər ki, komandası üçün hər şeyi etsin, dəridən-qabıqdan çıxsın. Bu amil də məni bir qədər yanılda bilər… Uşaqlıqdan, özümü biləndən İtaliyanın çılğın azarkeşi olmuşam. Bu hələ də qəlbimdə qalmaqdadı. Həmişə bu milliyə böyük simpatiyam olub. Bəlkə də yaxşı, baxımlı oynamayıb, daha çox müdafiə futboluna üstünlük verib. Amma heyətində həmişə ulduzlar yer alıb. Çoxlarının simpatiya bəslədiyi İtaliya mənim də sevdiyim komandadı. Təəssüf ki, bu mundialda iştirak etmirlər”.

“Təbii ki, imkan olduqca dünya çempionatını izləməyə çalışacam. Namizədlər çoxdu. Almaniya, İspaniya, Fransa, Braziliya, Argentina iddialı komandalardı. Mən isə daha çox İspaniya və Braziliyanı vurğulamaq istəyirəm. Həm heyətinə, həm də oyun keyfiyyətinə görə başqalarından seçilirlər. Belə görürəm ki, bu mundialda çempionluq uğrunda əsasən bu iki milli mübarizə aparacaq. İnanmıram ki, hansısa sürpriz yığma çempion olsun. Özüm isə daha çox ispan və alman futboluna üstünlük verirəm. Həmin komandaların çempion olmasını istəyərdim”.

“Fikrimcə, cari mundial Cənubi Amerika təmsilçilərinin benefisi ilə nəticələnəcək. Buna ən azı ümid edirəm. Çünki romantik futbol qəlblərə tac salırsa, praqmatik futbol yalnız həmin ölkənin təmsilçiləri üçün yaddaqalan olur. Avropada yalnız Niderland millisi daim fərqlənir, zaman-zaman isə İspaniya. Zənnimcə, Braziliya bu marafonda az da olsa, Argentinadan öndədi. Ancaq 1990-da 10 addım öndə olmasına rəğmən, “futbol sehrbazları” dahi Maradonanın bir ötürməsi sayəsində “silahı yerə qoymalı” olmuşdu. Bu gün də Argentinada dahi var - Messi! Leo üçün bu həm də son şansdı. Digər komandalara gəlincə, çox istərdim ki, Argentinaya nəsib olmayacaqsa, İngiltərə qalib gəlsin. Praqmatizmin atası Almaniyaya isə tezliklə mundialı tərk etməyi arzulayıram”.

"Bu dünya çempionatının həm keçirildiyi ölkə, həm də tarix çox qəribədi. Həmişə favoritlərdən biri olan Fransanın problemləri çoxdu. Bu səbəblərə görə konkret favoriti demək çətindi. Amma məncə, rəqabət daha çox Almaniya, Portuqaliya, Belçika, İngiltərə, hər nə qədər itkisi olsa da, Fransa, İspaniya, Cənubi Amerikadan isə Braziliya və Argentina arasında gedəcək. Əlbəttə, futbolda konkret favorit demək bir az çətindi. Əvvəllər vaxt bəlli olurdu, futbolçular bilirdi, mövsümün sonunda hazırlaşırdılar. Amma indi fərqli iqlimdi, mövsümün ortasıdı. Buna görə də favoriti demək çətindi. Hər halda, mübarizə qeyd etdiyim komandalar arasında gedəcək".