“Qarabağ” Futbol Akademiyasının aşağı yaş qrupları üzrə texniki direktoru Tacəddin Doğan klubun rəsmi saytına müsahibə verib.

Həmin müsahibəni təqdim edirik:

- Bugünkü seçimlər barədə fikirləriniz necədi?
- Ən kiçik yaş qrupları üçün seçim elan etdik və 50-yə yaxın uşağa baxdıq. Akademiya məşqçiləri ilə birlikdə izlədik və bir neçə uşağı bəyəndik. Amma bu o demək deyil ki, həmin uşaqları akademiyamıza götürmüşük. Həmin uşaqları yenidən sınayacağıq. Akademiyamızda futbolçularla eyni səviyyədə olacaqlarlarsa, onları götürəcəyik. Yeni yaradacağımız U-8 komandasına da bir neçə uşaq dəvət edəcəyik. Bundan əlavə U-12 üçün də bir neçə uşağı bəyəndik.

- Seçimlərin bölgələrdə aparılması gözlənilir?
- Bütün yaş qruplarına seçimlər aparmışıq. Bunda öncəki seçimlərimizə 400-dən çox uşaq qatıldı. Bu mövsümdən yenidən bölgələrə üz tutacağıq. Azərbaycanda istedadlı uşaqlar var və onları tapıb üzə çıxarmaq lazımdır. Premyer-liqa və divizionda komandası olmayan bölgələr bizim üçün ilk seçimdi. Ən yaxın zamanda Ağcabədiyə getməyi planlaşdırırıq. Bundan əlavə, tezliklə Şəki və Qaxda da seçimlər təşkil etməyi düşünürük.

- “Qarabağ” Futbol Akademiyasındakı fəaliyyətinizə nəzər salsaq, burda olduğunuz müddətdə nə dəyişib?
- İlk gündən qarşımıza qoyulan əsas hədəf komandaların və uşaqların inkişaf etməsi olub. Milli komandalara futbolçu yetişdirmək və oyunçuların inkişafı bizim üçün kubok qazanmaqdan daha önəmlidi. Ötən mövsüm 1 komandamız öz liqasını 1-ci tamamladı. Bundan əlavə, iki komandamız 2-ci və 3-cü yerləri tutdu. Ancaq daha vacib məqam budu ki, milli komandalara verdiyimiz futbolçuların sayında artım var. İldən-ilə bu sayda artım müşahidə olunur. Futbol olan yerdə tənqid qaçılmazdı. Yığma komandalar və AFFA-nın elit məşqlərinə 50 futbolçu göndərmişik. 50 futbolçumuz yığmanın məşqçilərinin diqqətindədisə, deməli, düz yoldayıq. Bizim də məqsədimiz milli komandalara daha çox futbolçu verməkdi.

- Azərbaycanda uşaq futbolunun inkişafına mane olan amillər hansılardı?
- Azərbaycanda fərdi idman növləri – cüdo, güləş, boks və.s daha yaxşı inkişaf edib. Komanda idman növlərində isə belə deyil. Bunları aradan qaldırmaq üçün uşaqların yaxşı məşq keçməsi üçün şərait lazımdı. Uşaqlara daha yaxşı məşqlər keçirilməlidi. Valideynlərin uşaqların üzərində basqısı olmamalıdı. 10-12 yaşlı oyunçu meydanda səhv edən zaman məşqçisini dinləmir, tribunada yer alan valideyninə baxır. Düzdü, valideynlərin də uşaqları ilə maraqlanması haqqlarıdı. Ancaq biz məşq meydançalarımıza kameralar quraşdırdıq və valideynlərə izləməsi üçün şərait yaratdıq. Meydanın kənarından valideynlərin məşqi izləməməsi üçün qərar qəbul etdik. Bu qərar uşaqların daha yaxşı inkişaf etməsi üçündü. Liqalarımızın oyunlarını mütəmadi izləyirik. Yarışların keyfiyyəti də qalxmalıdı. Bütün problemlər bir-birinə bağlıdı. Ölkə xaricinə futbolçularımızı yollamalıyıq. Avropa səviyyəli klub olduğumuz üçün biz əsas komandaya o keyfiyyətdə futbolçu hazırlamalıyıq.

- Akademiyamızın komandalarının ölkə xaricindəki turnirlərə yollanması gözlənilir?
- Bu məsələni klub rəhbərliyi ilə müzakirə edirik. Son olaraq Türkiyənin “Altınordu” klubuna müraciət olundu. Ancaq onların təşkil etdiyi turnirdə iştirakçılar bəllidi, hansısa klub imtina etsə, bizim ora getməyimiz mümkündü. Bütün yaş qrupları ilə maraqlanıram, liqalarımız izləyirəm. Əsas komanda Avropadakı çıxışı ilə göz önündədi və diqqət mərkəzindədi. Biz də əsas komandaya Avropa standartlarına uyğun futbolçular yetişdirməliyik. Daha keyfiyyətli futbolçuların yetişməsi üçün liqaların səviyyəsi də qalxmalıdı. Liqaların keyfiyyəti daha da artsa, uşaqları ölkə xaricindəki turnirlərə yollasaq, nəticələr də olacaq. Uşaqlara bu qapıları açmalıyıq və turnirlərə yollamalıyıq. Rəhbərliklə danışmışam və onlar da bu fikri dəstəkləyirlər. Sonda onu xüsusi ilə vurğulamaq istəyirəm ki, 4 ildi buradayam və əminliklə deyirəm ki, Azərbaycanda çoxlu istedadlı uşaqlar var. Tezliklə futbolsevərlər yeni adlar eşidəcəklər.