"Sabah" futbol akademiyasının U-10, U-12, U-13, U-14, U-15, U-16 komandaları aşağı yaş qrupu üzrə ölkə çempionatında qızıl, U-11, U-19 komandaları isə bürünc medalları qazandı.

Belədə akademiyanın aşağı yaş qrupları üzrə əlaqələndiricisi Təbriz Həsənova tribuna verməyimiz təbiidi.

- Təbriz müəllim, "Sabah"ın aşağı yaş qrupları üzrə komandaları 5 qızıl, 2 bürünc medal qazanmaqla rekord nəticə göstərdi. Bu uğurlar nəyin sahəsində gerçəkləşdi?

- Əsas səbəblər "Sabah"ın seçdiyi strategiya, yaratdığı şərait, akademiyamızda işlərin düzgün, peşəkarcasına aparılması, ümumiyyətlə, futbol oynamaq üçün hər cür imkan yaradılmasındadı. Hazırda U-16, U-17, U-19 komandalarımız BOS-un meydançasında, U-10-dan U-15-ə qədər olan yetirmələrimiz isə "Neftçi"nin köhnə bazasında məşq edir. Qarşımıza “mütləq çempion olmalısız” kimi tapşırıq qoyulmamışdı. Əsas məqsəd gələcəyin ulduz futbolçularını yetişdirməkdi. Sadəcə, yaradılan şərait, futbolçularımızın istəyi, meydandakı oyunlar nailiyyətləri doğurdu. Bir məqamı da xüsusi vurğulayım ki, "Sabah"ın futbol akademiyası "Vətən" futbol klubunun bünövrəsi üzərində qurulub. "Vətən"in uşaq futbolunda xidmətləri danılmazdı. Həmin klubdan da perspektivli uşaqları akademiyamıza cəlb etmişik.

- Akademiyanıza nə qədər futbolçu cəlb etmisiz?

- Əsas fəaliyyətlərimizdən biri seleksiya işləridi. Seleksiyaçı mütəxəssislərimiz daim bölgələrdə istedadlı uşaqları axtarır. Bu il bölgələrdən 70 istedadlı uşağı akademiyamıza cəlb etmişik. Onların qalmaq yeri, qidalanmaq, təhsil və başqa zəruri ehtiyacları akademiyamız tərəfindən ödənilir.

- "Sabah" akademiyasının ölkədəku başqa akademiyalardan üstünlükləri nədi?

- Başqaları haqqında fikir bildirməyim doğru olmaz. Odu ki, onlardan üstünlüklərimizdən yox, işlərimizdən danışaram. Akademiyamızda bütün yaş qrupları üzrə futbolçuların qayğıları yüksək səviyyədə qarşılanır. Bütün sahələr üzrə personalımız işində peşəkardı, komandalarımızda güclü rəqabət var. Hər bir futbolçunu nəzarətdə saxlayırıq.

- Yetirmələrinizin xarici klublara göndərilməsində maraqlısızmı?

- Bilirsiz ki, 3 ilə yaxındı Zaqreb “Dinamo”sunun akademiyası ilə əməkdaşlıq edirik. Xorvatiya klubu yetişdirdiyi gənc futbolçuları top liqalara ixrac etməklə məşğuldu. Onlarla əməkdaşlığımızın əsas məqsədlərindən biri budu ki, futbolçu ixracını mənimsəyək. “Dinamo”yla əməkdaşlıq sayəsində ildə 2-3 dəfə gənc futbolçularımız onların akademiyalarında məşqlərə qatılır, təcrübə toplayır və seleksiyaçıların diqqət mərkəzinə düşürlər. İnanıram ki, gələcəkdə yetirmələrimiz top-klubların diqqətini cəlb edəcək.

- Aşağı yaş qrupları üzrə komanlarlardan "Sabah"ın əsas və əvəzedici komandalarına neçə futbolçu cəlb olunacaq?

- Əsas komandanın məşqçilər heyəti bütün yaş qrupları üzrə komandaların fəaliyyətini izləyir. Neçə futbolçunun əvəzedici və ya əsas komandamıza keçidini dəqiq deyə bilmərəm. Amma perspektivli gənclərimizdən cəlb olunanlar olacaq.

- Növbəti mövsüm üçün hədəfləriniz nədi?

- Bu ayın 30-na kimi bütün komandalar üzrə məşqlərimiz davam edəcək. Ardınca il ərzindəki fəaliyyətimizlə bağlı hesabat vermək üçün daxili iclas keçirib qərarlar verəcəyik. Sonra komandaları istirahətə yollayacağıq. İstirahət bitəndən sonra qarşıdan bir neçə beynəlxalq turnir gəlir, onlara hazırlaşacağıq.

- Ötən mövsüm əsas komandanızın bəxti gətirmədi və mükafatçılar sırasına düşmədi. Növbəti mövsüm "Sabah"dan nə gözləyək?

- İnanıram ki, növbəti mövsümdə çempionluğa və kuboku götürməyə oynayacağıq. Ən azı 2-3-cü yerlərdən birini tutacağıq.

ABDULLA İSMAYILOĞLU