''Mançester Siti''nin türkəsilli almaniyalı ulduzu İlkay Gündoğan barəsində hər ötən ay transfer şayiələri bir qədər də artır.

Bu da təbiidi. Çünki onun ''Siti'' ilə müqavilə müddəti mövsümün sonunda bitir. Komandada kapitanlardan biri olan 32 yaşlı yarımmüdafiəçi Almaniyanın ''Kikker'' nəşrinə verdiyi müsahibədə gələcəyi barədə danışıb. O, yalnız bir məqamı – ''Liverpul''a keçməyəcəyini əminliklə söyləyib: ''Mən hələ bir neçə il də yüksək səviyyədə oynaya biləcəyimi düşünürəm. Ən azı bunu hiss edirəm. Ancaq istənildiyimə və mənə ehtiyac duyulduğuna da əmin olmalıyam. Müqavilə məsələsində heç bir tələskənliyə yol vermək istəmirəm. Bunun yaşla bağlı olub-olmadığını bilmirəm. Amma bu məsələdə çox rahatam. İlk baxışdan müqaviləmin bitməsinə çox qalmayıb. Amma digər tərəfdən 2023-ün yayı mənim üçün hələ də çox uzaq görünür. Ona görə də bu məsələ üzərində çox da düşünmürəm. Digər tərəfdən, heç Xosep Qvardiolanın da gələcək taleyi bəlli deyil. Onun da müqavilə müddəti mövsümün sonuna qədərdi.

Gələcəyi ilə bağlı nə planlaşdırdığını heç kim bilmir. İndiyə qədər karyeramla bağlı planlarımı məşqçinin kim olduğuna baxaraq qurmuşam. Çünki bir futbolçu üçün ən önəmli şey məşqçinin ona dəyər verməsi, ruhlandırması və motivasiyalandırmasıdı. Hər zaman söyləmişəm ki, Mançesterdə özümü rahat və xoşbəxt hiss edirəm. Bu komandaya çox şey borcluyam və burda həqiqətən də çox gözəl anlar yaşamışam. Bu üzdən hələ bir neçə il də ''Mançester Siti''də qalacağımı istisna etmirəm Transfer məsələləri kənardan göründüyü qədər asan olmur. Hətta Yürgen Kloppa görə də olsa, ''Liverpul''a transfer olunmağım mümkün deyil. Düzdü, Kloppu nə qədər çox sevdiyimi hər kəs bilir. Amma mən uzun illərdi ''Mançester Siti''dəyəm və üstəlik kapitanlardan biriyəm. Ona görə də ən böyük rəqibimizə transfer olunmaqdan söhbət belə gedə bilməz! 2016-da bu kluba transfer olunduğumda Qvardiolanın mənimlə bağlı müxtəlif planları var idi. Yeni mühitə tez uyğunlaşmaq qabiliyyətimi, oyunumu komanda yoldaşlarıma və sistemə uyğunlaşdımaq bacarığımı çox bəyənirdi. Eyni zamanda çətin vəziyyətlərdən sürətli şəkildə düzgün çıxış yolu tapa bildiyimi görürdü. Amma bizim üçün işlər heç də həmişə asan keçməyib. Qvardiola bəzən gözləmədiyi çətinliklərlə qarşılaşmalı olub. ''Mançester Siti''də oynayırsansa, ən yüksək performansını sərgiləməlisən. Bunu bacarmayan futbolçunun üzərində, təbii ki, təzyiq yaranır''.