Rassell karyerasında ilk dəfə zirvəyə qalxdı
Braziliya “Qran-pri”si “Mersedes”in dublu ilə bitdi. Bu komandanın britaniyalı pilotu Corc Rassell finiş xəttinə hamıdan tez çatdı.
24 yaşlı pilot San-Paulu mərhələsinə qədər cari mövsümdə 7 dəfə fəxri kürsüyə qalxa bilmişdi. O, Niderlandda yalnız qalibdən geri qalmış, Avstraliya, İspaniya, Azərbaycan, Fransa, Macarıstan və İtaliya mərhələlərində isə üçüncü olmuşdu. Rassellin komanda yoldaşı Lüis Hemilton 2-ci, “Ferrari”nin pilotu Karlos Sayns 3-cü yeri tutdu. “Mersedes” pilotlarının ilk iki pilləni “zəbt etməsi” bu komanda ilə “Ferrari” arasında Mühəndislər kubokunda ikinci olmaqla bağlı mübarizəni bir qədər də gərinləşdirdi. İtaliya komandası indi Almaniya komandasından cəmi 20 xal irəlidədi ki, mövsümün sonuncu – Əbu-Dabi mərhələsində bu fərqi aradan qaldırmaq mümkündü.
Reaksiyalar
Corc Rassell:
“İnanılmaz hisslər yaşayıram. Bütün komandaya dərindən təşəkkür edirəm, yoldaşlarım bugünkü uğuru mümkün etdi. Bu mövsüm emosional planda Amerika karusellərinə bənzəyir. Trassda təhlükəsizlik maşınını görəndə anladım ki, sonluq çox ağır olacaq, komanda yoldaşım ciddi təzyiq göstərirdi. Qələbə qazana bildiyimə görə hədsiz sevincliyəm”.
Lüis Hemilton:
“Düzünü desəm, özümü çox yaxşı hiss edirəm. Bu il hədsiz çox çalışdıq. Bütün komanda adına sevinirəm. Yaxşı ki bu yerə gəlib çatdıq, yaxşı ki fəxri kürsü uğrunda mübarizə aparırıq, yaxşı ki bu gün ilk iki yer bizim oldu. Bu qədər sürətli olacağımızı gözləmirdim. Bu, sadəcə, inanılmazdı”.
Karlos Sayns:
“Düşünürəm ki, ümumilikdə yaxşı yarış oldu. Əvvəlcə əyləc sisteminin alovlanmasıyla bağlı müəyyən problem yaşadım. Bu üzdən üç pit-stoplu taktikaya əl atmaq lazım gəldi. Bundan sonra Peresə çatmaq üçün hücum etməili oldum. Nəticədən razı qala bilərik. “Mersedes”dən olan rəqiblərimizin belə yüksək sürəti məni məyus etsə də, Rasselli təbrik edirəm”.
Digər xəbərlər
