“Avropa futbolu dünya idmanında aparıcı rolunu itirir”
Superliqa ideyası Avropa futbolunun üzərini qara bulud kimi alıb və çəkilmək bilmir.
Bu layihənin yeni baş direktoru Bernd Rayhart da fəallaşmağa başlayıb. O, Toni Kroosun “Einfach Mal Luppen” podkastında maraqlı açıqlamalar verib:
“Biz UEFA-ya dialoq yolu təklif etdik və bu təklif qəbul olundu. Gələn həftə bu məsələni qitə futbol qurumu ilə müzakirə etmək üçün Nyona yollanacam. “Dialoq” ifadəsi altında belə anlayıram ki, hər iki tərəfin fikirləri dinlənilsin, bu ideyanı müzakirə edə bilək. Əlbəttə, bütün məsələlərdə razılaşa bilmərik. Ancaq bu məqam hələ də yan gəzən, bəlkə də ideyaya görə sanksiyalarla üzləşəcəyindən ehtiyatlanan klublar üçün yaxşı əlamətdi”.
Kroosun verilişinə Rayhartı çağırması təsadüfi deyil – “Real”ın yarımmüdafiəçisi klub prezidenti Florentino Peresin əsas ideoloqu olduğu Superliqa
ideyasını tam dəstəkləyir. Toninin açıqlamasına baxaq:
“Heç vaxt öz prezidentinə qarşı getmək olmaz (gülür). Bu çoxdan olmalıydı. Düşünürəm ki, bu ideyanın gerçəkləşməsi üçün müəyyən vaxt lazımdı, bəlkə də mən fəaliyyətdə olan oyunçu kimi həmin günləri görməyəcəm. Fikrim belədi ki, bunun baş verəcəyinə hələ də inanıram, ancaq məhz nə vaxt olacağını deyə bilmərəm”.
Rayhartın dediyinə görə, yaxın iki-üç il ərzində Superliqa ideyası işə düşməlidi. Təxmini start tarixi kimi 2024/25 mövsümü göstərilir. Düzdü, ideyanın yaradıcı olan 12 klubdan hələ ki yalnız üçü onu fəal şəkildə dəstəkləyir. Sadəcə, əvvəllər Superliqa ideyasını “Real”, “Barselona” və “Yuventus” bossları çılğın şəkildə təbliğ edirdisə, indi bu funksiyanı Rayhart öz üzərində götürüb. Almaniyalının bəzi yeni açıqlamaları:
• Superliqanın statusu haqda: “Çox canlıdı. Onun ölü olduğunu demək istəyənlər var, ancaq haqqında çox danışılması hər şeyi aydın göstərir. Avropada, heç şübhəsiz, “Yuventus”, “Real” və “Barselona”nın baxışlarını bölüşən klublar var və indi onlar öz fikrini bildirmək imkanı qazanıb”.
• Premyer-liqa klubları ilə danışıqlar haqda: “Biz könüllü danışmağı təklif edirik. Kimsə qapıları bağlayırsa, əlbəttə, belələri ilə təmas qura bilmərəm. Ancaq gözləyirəm ki, əsas klublar maraq göstərəcək, bu durumu müzakirə etmək istəyəcəklər. Bir qrup klub var ki, hələ də bu ideyanın marağındadı və tənqidlərə baxmayaraq, həll yolları təklif edirlər. Bu klublar qayıdırlar, bizi dinləyirlər, özləri üçün bəzi yeni mətləblər hasil edirlər və dialoqa qoşulurlar”.
• Format haqda: “Heç kimi arxada qoymaq istəmirik. Yeni yanaşmamızda Superliqaya yüksəlmək və oranı tərk etmək də nəzərdə tutulub. Avropa futbolu dünya idmanında aparıcı rolunu itirir, klublar isə imkanlar baxımından geri qalır. Mövcud sistem yetərincə qeyri-sabitdi, bəs etmir. Düşünürəm ki, klubların öz taleyini müəyyənləşdirmək imkanı olmalıdı, onlar da maliyyə riskləri ilə üzləşirlər. Klubların əksəri daha belə davam etməyin mümkün olmaması ilə bağlı fikirlə razılaşır”.
Superliqa üçün yeni struktur yaradılıb
Superliqa ideyası ilə bağlı dəyişikliklər 20 gün əvvəl açıqlanıb. 48 yaşlı Bernd Rayhart “A22 Sports Management”in rəhbəri təyin olunub. Bu artiq Superliqanın dəstəklənməsi və inkişafı ilə məşğul olacaq ayrıca şirkətdi. Rayhartın ilk vəzifəsi klublar, oyunçular, məşqçilər, azarkeşlər, media və siyasi xadimlər qarışıq futbol ictimaiyyətinin geniş təbəqələri ilə dialoqu qaydaya salmaqdı. O, salamlaşma mesajında belə deyib:
“Avropa klub futbolunda indiki durum öz-özünə həll olunmayan problemlərlə xarakterizə olunur. “Real”la “Barselona”nın prezidentləri, həmçinin “Yuventus”un sədri yaxınlarda idman qarşısında duran problemlərlə bağlı baxışlarını ortaya qoyub. Hesab edirəm ki, onlar doğru suallar qoyurlar. Şəxsən mən onda maraqlıyam ki, çoxlu fərqli fikir eşidək, Avropa futbol ictimaiyyəti birlikdə doğru cavablar tapsın. Hamımızın sevdiyi oyun məhdudiyyətlərdən azad olan açıq və səmimi dialoqdan qazanacaq, ciddi islahatlar yolu ilə futbolun parlaq gələcəyin nail olmalıyıq”.
Rayhart haqda nə bilirik?
O, yaxın vaxtlara qədər Almaniyanın “RTL Deutschland” media şirkətində baş direktor vəzifəsini tutub. Karyerasına “UFA Sports” idman marketinqi agentliyində başlayıb, 2003-cü ildən isə idman hüquqları üzrə ixtisaslaşan “Sportfive” agentliyində marketinq üzrə menecer kimi çalışıb. 2004-də İspaniyanın “Antena 3” (indi “Atresmedia” adlanır) media şirkətinə keçib, orda artıq investorlarla əlaqələr üzrə bölməyə rəhbərlik edib. 2007-13 aralığında almaniyalı “Multichannel”də icraçı direktor olub. 2013-də “RTL Group”da işə başlayıb, VOX telekanalının direktoru olub. 2019-un yanvarında “RTL Deutschland” qrupunun direktoru vəzifəsinə yüksəlib və ötən ilin sonuna qədər bu qurumu idarə edib.
Superliqanın bossları məhkəmə qərarını gözləyir
Rayhartın dialoq təşəbbüsü Avropa Məhkəməsində davam edən proseslə paralel irəliləyir. Qurumun ya dekabrda, ya da gələn ilin əvvəlində qərar verməsi gözlənilir. Bu iş üzrə iddiaçılardan biri də “A22 Sports Management” şirkətidi. Söhbət nədən gedir? Madrid məhkəməsi ötən il inqilab cəhdinə görə klubların intizam tədbirlərinə məruz qalmasına etiraz, bunun dayandırılmasını tələb edən “Real”, “Barsa” və “Yuve”nin tərəfini tutdu. UEFA cavabında hakim Manuel Ruis de Laranın prosesdən uzaqlaşdırılmasını tələb etdi, ancaq imtina ilə üzləşdi, üstəlik qitə futbol qurumu cərimələndi və üzərinə məhkəmə xərclərini ödəmək qoyuldu. Ardından iş Avropa Məhkəməsinə yönəldi, indi bu qurumun vəzifəsi UEFA-nın fəaliyyətinin inhisarçılığa xidmət edib-etmədiyini, rəqabət qanununun pozulub-pozulmadığını müəyyənləşdirməkdi. Məhkəmə ya UEFA-nın beynəlxalq yarışları keçirməklə bağlı müstəsna hüququnu tanıyacaq, ya da Superliqanın təşkilatçılarına fəaliyyət azadlığı verəcək.
Həmin vaxta qədər Rayhart, Peres və Anyellinin Superliqanın yeni layihəsinin uğursuzluğa düçar olan variantdan fərqlənməsi ilə bağlı bəzi bəyanatlar verəcəyi gözlənilir. Turnirin təşkilatçıları yeni formatda bəzi klubların iştirakının öncədən təmin olunması ilə bağlı bənddən imtina edəcək – buna görə ciddi tənqidə məruz qalıblar. İdeya rəhbərləri bu dəfə daha çox sayda klubun iştirakı ilə keçiriləcək müzakirələrin gedişində yeni format hazırlamağı planlaşdırır. Hələ ki ideyanın əsas əleyhdarları həminkilərdi – UEFA və La Liqanın bossu Xavyer Tebas. UEFA prezidenti Superliqanın futbol saymır, Tebas isə belə hesab edir ki, dialoq mümkünsüzdü: “Real” və “Barselona” ilə problem futbolun baza prinsipləri, mövcudluğu ilə bağlıdı. Siz həyatla bağlı bir cür düşünürsüz, onlar başqa cür. Məsələn, bəziləri abortu dəstəkləyir, bəziləri də onun əlayhinədi, belədə konsensus mümkünsüzdü. Onlar milli liqalar üçün öldürücü modelin tərəfdarısa, konsensusa necə nail olaq? Burda razılığa gəlmək mümkünsüzdü, ya lehinəsən, ya da əleyhinə. Klubların məhvinə aparan məsələdə konsensusa nail olmaq mümkün deyil”.
Digər xəbərlər
