Bir neçə gün əvvəl Avropa Superliqası layihəsinin yeni baş direktoru təyin edilən Bernd Rayxart UEFA-nı qorxuya salan açıqlama verib.

O, hələ ki kağız üzərində olan turnirin reallaşması üçün növbəti cəhdin ediləcəyinə işarə vurub.
Xatırladaq ki, 2021-ci il aprelin 18-də “Arsenal”, “Liverpul”, “Tottenhem”, “Mançester Yunayted”, “Mançester Siti”, “Çelsi” (hamısı İngiltərə), “Real”, “Barselona”, “Atletiko” (hamısı İspaniya), “Yuventus”, “Milan” və “İnter” (hamısı İtaliya) Superliqanı yaratdıqlarını rəsmən bəyan etmişdilər. Lakin iki gündən sonra “Real”, “Barselona” və “Yuventus”dan başqa digər klubların layihədən çıxması ilə yeni turnirin başlamadan bitdi. 6 ay əvvəl fəaliyyətini dayandıran layihənin bir neçə ildən sonra yenidən start götürməsi gözlənilir: qitənin bəzi aparıcı klubları bu ideyanı 2024-cü ildə həyata keçirməyi planlaşdırır.

Layihənin yeni baş direktoru ilə tanış olaq. Rayxart Superliqa layihəsini dəstəkləyən “A22 Sports Management” şirkətinin rəhbəri təyin olunub. 48 yaşlı almaniyalı menecer bundan əvvəl nəhəng “RTL media group” mediaholdinqinə başçılıq edib. Onun ilkin vəzifəsi klublar, oyunçular, məşqçilər, azarkeşlər, KİV və siyasətçilər də daxil olmaqla futbol ictimaiyyətinin daha geniş qrupu ilə dialoq yaratmaq olacaq. Yeri gəlmişkən, oktyabrın əvvəlində Superliqanın təsisçiləri olan “Real”, “Barselona” və “Yuventus” rəsmilərinin qitənin digər klubları ilə layihənin yeni formatını müzakirə edəcəkləri haqda xəbər yayılmışdı.
Görünən odu ki, təsisçilər UEFA-nın qətiyyətlə üzərindən qara xətt çəkdiyi layihəni yenidən dirçəltmək, ictimaiyyət arasında aktuallaşdırmaq və təbii ki, dəstək qazanaraq reallaşdırmaqda qərarlıdılar. Yeni baş direktor Rayxartın sözlərinə görə, Avropa Superliqasının 2024/25 mövsümündə başlaması gözlənilir:

Yeri gəlmişkən, UEFA-nın prezidenti bu mövzuda növbəti mənfi reaksiyasını dilə gətirib. Buenos Ayresə səfər edən Aleksander Çeferin Argentina Futbol Assosiasiyasının rəhbəri Klaudio Tapya və Cənubi Amerika Futbol Konfederasiyasının prezidenti Alexanrdo Domingeslə görüşündən sonra qısa mətbuat konfransı təşkil edib. O, jurnalistin Superliqa layihəsi ilə bağlı sualının cavabında belə deyib:

“Biz bura futbol haqda danışmaq üçün toplaşmışıq, Superliqa isə futbol deyil”. Sloveniyalı funksioner Superliqa layihəsinin təmsilçilərindən məktub aldığını da bildirib. Amma UEFA-nın prezidenti həmin məktubu yalnız Avropaya qayıdandan sonra oxuyacaq: “Onların bizə daha güclü şəkildə yaxınlaşmaq istəyəcəklərinə əminəm”.

Bu arada İspaniya futbolunda Superliqa ilə bağlı olan hadisə baş verib. Bu ölkədə qəbul olunan yeni idman qanununda klubların eyni zamanda yerli turnirlərdə və Superliqada iştirakına icazə verən maddələr nəzərdə tutulub. Bu isə məlum ideyanın qatı əleyhdarı olan Xavyer Tebasın böyük narahatlığına səbəb olub. La Liqanın prezidenti tələm-tələsik oktyabrın 27-də ölkə çempionatının ilk iki divizionunda çıxış edən klubların növbədənkənar iclasını çağırıb. Həmin iclasda aparılacaq müzakirələr nəticəsində ayın 28-dən başlayaraq hər iki liqanın dayandırılmasına qərar verilə bilər. La Liqanın rəhbəri yeni qanunun CVC sərmayə fondu ilə müavilənin pozulmasına səbəb ola biləcəyindən çəkinir. Qeyd edək ki, anlaşmanın şərtinə əsasən, fond klublara ümumilikdə təxminən 2 milyard avro ödəməlidi. “El Mundo” qəzeti “Real”, “Barselona” və “Atletik” istisna olmaqla ilk iki divizionda çıxış edən 42 klubdan 39-nun yeni qanunun əleyhinə olduğunu xəbər verib. Odu ki, La Liqa və La Liqa 2-də gələn həftəsonuna nəzərdə tutulan turların baş tutmamaq ehtimalı yüksəkdi. Görünür, qanunu yenicə qəbul edənlər bunun ölkə futbolu üçün hansı fəsadlara səbəb ola biləcəyini düşünməyiblər...