"Tovuzda futbol bayramıdı. Uzun müddətdən sonra "Qarabağ" Tovuz sakinlərinin doğma klubuyla qarşılaşır. Həmçinin Zəfər Günü ilə bağlı Şəhidlər Xiyabanını ziyarət etdik. Allahdan vətən uğrunda canından keçən bütün şəhidlərimizə rəhmət diləyirəm. Bura gəlməyimizin başqa səbəbi də var. Belə ki, Tovuzda "Mina və partlayıcı hərbi sursatlarların təhlükəsizliyinə dair" məlumatlandırma layihəsinə start veririk. Layihə Tovuzun mina təhlükəsi olan kəndlərində həyata keçiriləcək. Qarşıdakı 2 ay ərzində "Qırmızı Xaç", UNİCEF, ANAMA, Avropa Birliyini maliyə dəstəyi və "Turan Tovuz"un futbolçularıyla birlikdə Tovuzun mina təhlükəsi olan kəndlərində maarifləndirici tədbirlər planlaşdırılıb. Bunu tovuzli futbolçular vasitəsilə daha əyləncəli və maraqlı etmək istəyirik. Layihəmizlə bağlı videoçarxımız da var. Orda "Turan Tovuz"un baş məşqçisi Ayxan Abbasov, klubun icraçı direktoru Nadir Nəbiyev, futbolçulardan Kamal Bayramov və Səbayıl Bağırov da yer alır. Bugünkü oyunda "Mina təhlükəsizliyinə dair məlumatlandırma ayı", "Uşaqlarınız gülərüz və təhlükəsiz şəraitdə oynasın" plakatları nümayiş etdirdik. Həmçinin 4 il əvvəl minaya düşən və ayağını itirən Tovuzun Əlibəyli kənd sakini Elgün Hüseynov topa ilk zərbəni endirdi. Elgün də bizim layihəmizdə iştirak edəcək".