Dünən Azərbaycan Şahmat Federasiyasının (AŞF) prezidenti Mahir Məmmədovun rəhbərliyi altında İcraiyyə Komitəsinin 2022-ci ildə növbəti iclası keçirilib.

"Football-plus.az" saytının məlumatına görə, gündəliyə uyğun əvvəlcə 2022-də Azərbaycanda təşkil olunan yerli və beynəlxalq turnirlərin yekun nəticəsindən danışılıb. Mahir Məmmədov sentyabrda “Shusha Chess 2022” beynəlxalq turnirinin təşkilatçılığında mühüm rol oynayan Gənclər və İdman Nazirliyinə, Şuşa Şəhəri Dövlət Qoruğu İdarəsinə və sponsorlara təşəkkürünü bildirib.
AŞF rəhbəri həmçinin Naxçıvanda 16 yaşlılar arasında Ümumdünya Şahmat Olimpiadasının yüksək səviyyədə təşkil olunduğunu qeyd edib və bu işdə Naxçıvan Şahmat Federasiyasının böyük əməyini vurğulayıb. İclasda AŞF-nin nəzdində fəaliyyət göstərən Məşqçilər, Uşaq və Gənclər, Bəstəçilik, Regional İnkişaf, Sosial Layihələr Komissiyasının rəhbərləri cari ildə görülən işlər barədə məlumat verib, gələn illə bağlı təkliflərlə çıxış ediblər.


Görüşdə yığmaya seçim şərtləri, təqaüd alacaq şahmatçıların müəyyən olunma kriteriyaları, 2023-ün büdcəsi və yeni ilin təqvimi müzakirə edilib. 2023-cü ildən etibarən Azərbaycan çempionatında birinci yeri tutacaq şahmatçının ölkənin əsas milli komandasına dəvət olunmasıyla bağlı fikir mübadiləsi aparılıb. Yeni qaydaya əsasən ölkə çempionu yığmada ən aşağı reytinqə malik şahmatçını əvəz edəcək və il ərzində federasiyadan təqaüd alacaq.