Misli premyer-liqasının 13-cü turuna yekun vurulub.

Son matçda "Qarabağ" "Kəpəz"i məğlub edib - 3:1. Oyundan sonra ağdamlıların çalışdırcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- Tərlan Əhmədov hakimləri günahlandırdı. Sizin münasibətiniz necədi?
- Heç avrokubok oyunlarından sonra çox münasibət bildirmirəm. Qaldı ki, öz hakimlərimizdən danışım. Mənə aid olan məsələ deyil. Hakimlər barədə nadirən fikir bildirmişəm, çox etiraz etməmişəm.

- Musa Qurbanlı topu götürüb penalti nöqtəsinə qoyanda nə düşündüz?
- Düşünəcək bir şey olmadı. Bombardirlik yarışında heç vaxt intizamdan kənara çıxmamışam. Dəfələrlə olub ki, kimsə penalti vurmaq istəyib, amma əsas penaltiçi vurub. Ramil Şeydayev məni aldatdı, oturduğu yerdən dedi ki, Musa vursun. Bir az nizam-intizamdan kənara çıxdıq. Vuranda da çox şey fikirləşmədim. Birinci və axırıncı dəfə oldu. Nizam-intizamdan kənara çıxmaq olmaz.

- Nəriman Axundzadə artıq iki matçda meydana çıxıb. Onun çıxışını necə dəyərləndirirsiz?
- Yaxşıdı. Bəzən yaş olaraq, bəzən isə təcrübə olaraq gənc olursan. Hələ təcrübə olaraq çox cavandı. Mövsümün əvvəlində götürmüşük. Bəzi gənc oyunçularımız daha əvvəldən burda idi, onlar üçün daha rahat olub. İmkan olduqca Nərimana şans verəcəyik. Yaxşı olsa, çəkinmədən meydana buraxacağıq. Yaşına yox, təcrübəsinə önəm verirəm.

- Rotasiyalarla oyunçulara istirahət etmək imkanı yaradırsız. Bəs özünüz dincələ bilirsiz?
- Mən həmişə sizinləyəm, sizin qarşınızdayam. İstirahətə vaxt olmur. Eybi yox, əsas futbolçular istirahət etsin, biz birtəhər yoluna qoyarıq. Yorğunluq, gərginlik olur. Məşqçi yorğunluğu tam başqadı. Düşüncələr də çox olur. Yazılar, müsahibələr oxuyuram, diskussiyalar olur. Mənim üçün xoşdu. Təki belə yorğunluq olsun və yaxşılığa doğru getsin. Azarkeş razı qalanda, komanda yaxşı oynayanda mənim istirahətim bu olur.

- Ağır periodda “Sabah”la matçınız da olacaq..
- Çox istərdim ki, hər iki komanda ən yaxşı formasında olsun və baxımlı, sürətli oyun alınsın. Komandada yorğunluq hiss olunur. Ən gərgin və vacib perioddayıq. Oyunlar nə qədər yorursa, səfərlər daha ağırdı. Tovuz səfəri də asan deyil. Dözməliyik. Futbolçular bunu qəbul etməlidi. İstəklərimizdən əl çəkməyəcəyik. Narahatlığım var. Çalışıb, düzgün qərar verməyə çalışacağıq.

- Yazılar, müsahibələr oxuduğunuzu dediz. Özünüz şəxsən mətbuatı izləyirsiz, yoxsa mətbuat katibi Gündüz Abbaszadə sizi məlumatlandırır?
- Gündüz məndən çox izləyir. Ancaq özüm də baxıram. Hörmət əlaməti olaraq izləməliyəm. Sizin işinizdisə, diqqət ayırmalıyıq. Sabah kimsə soruşanda ki, belə yazı olmuşdu, mən də ondan soruşmayım. Gündüz də məlumat verir, amma mən də maraqlanıram. Heç nə gözümdən qaça bilməz. Hər birinizi izləyirəm.