Aprelin 3-4-də basketbol üzrə Avroliqada əvvəlki turlardan təxirə salınan iki oyun keçirilib.

“Fənərbaxça” uzun fasilədən sonra ilk qələbəsini qazansa da, bunun faydası yoxdu, yəni “sarı-lacivərdlilər” pley-offda olmayacaq. Elə “Jalgiris” də bu şansı itirib. Litvalıların “Srvena Zvezda” ilə ev oyununda qalmaqal yaşanıb. Qonaq basketbolçular Ukrayna bayrağını əldə saxlamaqdan boyun qaçırıb. Litvalı azarkeşlər oyunun gedişində NATO-nun və Ukraynanın bayraqlarını yelləməklə yanaşı, serb oyunçuların və basketbolçuların da ünvanına təhqiramiz şüarlar səsləndiriblər. Serbiyanın beynəlxalq aləmdə baş verən bütün hadisələrdə Rusiyanın tərəfini saxladığını nəzərə alsaq, burda qəribə heç nə yoxdu. Xatırladaq ki, Serbiya prezidenti Aleksandr Vuçiç bir müddət əvvəl ölkəsinin artıq Avroliqadan qovulan Rusiya klublarının ev oyunlarını qəbul etməyə hazır olduğunu bildirmişdi.

Gözlənildiyi kimi, son qalmaqal bütün dünyanın diqqətini cəlb edib. “Srvena Zvezda” bəyanatla çıxış edərək, bunu siyasi aksiya adlandırıb və Litva klubuna münasibətdə intizam işinin açılmasını istəyib.
Bu arada “Monako”nun oyun qurucusu Mayk Ceyms Avroliqada ötən ayın ən dəyərli basketbolçusu sayılıb. Onun orta göstəriciləri 19,8 xal, 3,8 ribaund və 5,4 ötürmə olub. Yazın ilk ayını 4 qələbə və 1 məğlubiyyət ilə bitirən “knyazlar” pley-offda oynamaq hüququ da qazanıb. Ceyms əvvəllər də iki dəfə ayın ən yaxşısı sayılıb – 2019-un fevralında “Milan”ın, 2020-nin noyabrında ÇSKA-nın şərəfini qoruyarkən.

21-ci turdan təxirə salınan oyun
Jalgiris (Litva) – Srvena Zvezda (Serbiya) 103:98 OT (23:14, 22:18, 15:35, 28:21, 15:10)
26-cı turdan təxirə salınan oyun
Fənərbaxça (Türkiyə) – Bavariya (Almaniya) 81:76 (27:16, 18:15, 9:31, 27:14)