Hərdən özlüyümdə gənclər və idman naziri, çox hörmətli Fərid Qayıbova yaxşı mənada paxıllığım tutur.

Adam nə qədər enerjili və həvəsli olarmış?! Fikrimcə, ölkədə azsaylı nazirlərdəndi ki, öz yerindədi. Həm gəncdi, həm də idmanı sevən biridi. Bir gün səsi Suqovuşandan gəlir, heç üstündən 24 saat keçməmiş Zəngilana baş çəkir. Evə aldığım iki zavod çörəyini yeyib qutarmamış eşidirəm ki, artıq Mingəçevirə çatıb. Sonra bəzi ağzıgöyləçəklər, ölkədə sabitliyi pozmaq istəyənlər, düşmən dəyirmanına su tökənlər deyirlər ki, niyə cənab nazir “feysbuk”da bu günə kimi 61 ölkədə olduğunu yazıb özünü reklam edir? Adamın həvəsi və enerjisi aşıb-daşır. Gəzir, səyahət edir, sizə nə? İstəsə, sabah və ya birisigün Everestə qalxar və ya Marian çökəkliyinə baş vurar. Gənclər və idman naziri məhz belə olmalıdı. Fərid bəy yaxşıdı, ətrafındakılar işlərini bacarmırlar...

Ancaq cənab nazirin, daha doğrusu, rəhbərlik etdiyi qurumun işində bir əmma var. İstəmzədim onu qabardım, yazının əvvəlində Qayıbovun ünvanına söylədiyim gözəl sözlərdən sonra onun qanını qaraldım. Ancaq nazirliyin son addımı məni buna məcbur etdi. Deməli, ötən həftəsonu bir qrup həmkarım nazirliyin dəvəti ilə Zəngilanda, daha doğrusu, Ağalıda keçirilən triatlon yarışını işıqlandırmaq üçün səfərə çıxdı. Çox gözəl, çox pakizə. Mənfur düşmənlər görməlidi ki, bizim idmançılar həm yaxşı qaçır, həm üzür, həm də sərrast atırlar. Ancaq məni təəssüfləndirən başqa məqamdı. Səfərə yollananlar arasında “Futbol+”in əməkdaşı yox idi. Zəngilana gedən heyəti kimin müəyyənləşdirdiyindən xəbərsizəm. Ancaq görünən odu ki, həmin şəxsin nə ölkə idmanına, nə də idman mediasına hörməti var. Əks halda bu günlərdə 25 yaşını qeyd edən, ölkə idmanının inkişafına böyük töhfə verən qəzet niyə yaddan çıxsın ki? Yeri gəlmişkən, həmin şəxs kimdisə, heç 25 illiklə bağlı “Futbol+”i təbrik etməyi belə özünə sığışdırmadı. Ancaq biz bundan incimirik. Necə deyərlər, sirkə nə qədər tünd olarsa, öz qabını sındırar...

RƏŞAD