“Biznesdə çoxlu haram pul qazanmaq yolları var. Bir müsəlman kimi sələmçilikdən daim uzaq durmağa çalışmışam. Sələmə pul vermək böyük günahdı. Ancaq bu mənim üçün çətin durumdu – pulu harda saxlamalı? Haralarasa yatırım edirəm, ancaq Amerikadakı bank hesabımda da pul var. Bu pulları halal yerdə saxlasaydım, xoşbəxt olardım. Ancaq... Bankın pulumdan yararlandığını bilirəm. Bank hesabımda milyonlarla dollar varsa, bank onu nə edəcək? Təbii ki, ya faizlə kredit verəcək, ya da başqa harasa xərcləyəcək. Ancaq mənim alternativim yoxdu, pulumu harda saxlayım? Cibimdə saxlayası deyiləm ki?! Bu üzdən sevinirəm ki, halal investisiya ilə məşğul olan “Wahed” şirkəti mənimlə əlaqə saxladı, baxışlarımız, missiyamız eynidi. Mənim üçün sələmin, faizlə kreditin olmadığı platformanın yaranmasında iştirak çox vacibdi. Sələmçilik ən böyük günahlardan biridi. Bu nəinki bir adamı, şəhərləri, ölkələri də öldürür. Demək olar ki, qatilliyə bərabər günahdı”.

“Sevimli yeməklərim? Toyuğu, salatı, burgerləri sevirəm, ancaq hamısını yox. Yüksək keyfiyyətdə olanını. Qazlı suyu sevirəm. Ancaq son bir neçə gündə, yəni bir həftədə qazlı suyu yığışdırmışam. Ona görə ki, indi uşaqlarla toplanışdayam, fiziki hərəkətlər zamanı onlarla ayaqlaşmalıyam. Qazlı su içəndə adam özünü ağır hiss edir. Özünə, çəkinə nəzarət etmək çox vacibdi. Mən özümü 93 kq-da saxlayıram. Yaxın 10 ildə bu səviyyədə qalmaq hədəfimdi. Bundan artıq olmasın. Bundan aşağı da çətindi. Aşağı salmaq üçün pəhriz saxlamaq, şəkərdən qaçmaq lazımdı. Mən isə enerjimi alan adamlarla da görüşməli oluram. Ətrafımda enerji verən adamların sayı çox deyil. Şəkər, qazlı su bəzən adama enerji verir”.

“Sosial şəbəkələrlə yaşamağa məcburuq. Bunlarsız indi çox çətindi. Gündə bir saat “instaqram”da oluram. “Vatsap”da gündə 4-5 saat olmağım da dəqiqdi. Hələ yatmaq, məşq etmək, maşın sürmək, ailə ilə vaxt keçirmək, bizneslə də məşğul olmaq lazımdı. Və bütün bunlar üçün cəmi 24 saat var. Odu ki, dəqiq qrafik lazımdı. Bu ilin sonuna qədər bütün günlərin qrafikini qurmuşam. Oktyabr, noyabr, dekabr – hər gün harda olacağımı bilirəm. Əlbəttə, sabah nə olacağını yalnız Allah bilir. Ancaq ilin sonuna qədər biletlərim, planlarım hazırdı. Bəzən kəndimə uçur, telefonu söndürür, orda üç-beş gün, bir həftə keçirirəm. Vəssalam. Bəzən hər şeydən qopmaq lazımdı. Dünya indi çox kiçikləşib, hamı hər şeyi bilir”.

“Düzünü desəm, döyüşlər üçün darıxmıram. Darıxanda idman zalına yollanır, güləşir, məşq edirəm. Enerjimi xərcləyirəm. Yenidən qəfəsə dönmək? Yox, bunun üçün darıxmıram. Əlbəttə, döyüşmək xoşuma gəlirdi, ona görə ki, məşğul olduğun işi sevməlisən. Böyük idman həvəskarıydım, hədəfim ən yaxşı, çempion olmaq idi. Ancaq karyeramı bitirəndə hər şey bitdi. Heç nə məni dönməyə məcbur edə bilməz. Heç vaxt. Həmişə kimsə çempion olacaq. Mən çempion olmuşam, indi başqa çempion var və bu da normaldı. Bitir və “bay-bay” de. Pul qazanmaq üçün qala bilərsən, ancaq bir daha heç vaxt çempion olmayacaqsan”.