Fətullah Gülən Terror Təşkilatına (FETÖ) üzv olmaqda günahlandırılan sabiq futbolçu Zəfər Biryol srağagün İstanbulda həbs olunub.

Football-plus.az xəbər verir ki, 46 yaşlı Biryol hələ 2019-cu ildə eyni vəziyyətlə üzləşmişdi. O vaxt sabiq forvard məhkəmənin qərarı ilə azadlığa buraxılsa da, onun ölkəni tərk etməsinə qadağa qoyulmuşdu. Amma sonradan ortaya yeni dəlillər çıxdığından Zəfər Biryola qarşı cinayət işi açılmışdı. Biryola daha öncədən 6 il 3 aylıq həbs cəzası verildiyindən onun yenidən axtarışına başlanılmışdı.

Bir müddət hüquq-muhafizə orqanlarından gizlənməyə müvəffəq olan və həbs qərarının yenidən qüvvədən düşəcəyinə ümid edən Biryol srağagün Büyükçəkməcədə yaxalandı. Araşdırma zamanı onun FETÖ ilə əlbir olan və artıq fəaliyyətini dayandıran “Bank Asya”da hesabının olduğu üzə çıxıb. Ən əsası sabiq futbolçunun bir neçə dəfə Fətullah Güləni ziyarət etdiyi məlum olub. Terror təşkilatının toplantılarında fəal işitrak edən Biryol 2012-14-cü illərdə FETÖ adına fəaliyyət göstərən bir kursun təşkil etdiyi futbol turnirində qalibləri mükafatlandırırmış. Qeyd edək ki, Zəfər Biryol peşəkar karyerası ərzində 11 fərqli klubun şərəfini qoruyub. 2000-ci illərin əvvəllərində populyar oyunçulardan sayılırdı.

Hətta 2003/04-də “Konyaspor”un heyətində vurduğu 25 qolla Türkiyə çempionatının bombardiri də olub. 2005-də “Fənərbaxça”ya transfer olunsa da, İstanbul nəhəngində özünü göstərə bilməyərək bir il sonra ayrılmaq məcburiyyətində qalmışdı. Türkiyə yığmasında isə 5 oyunda forma geyərək 1 qol vurub.