Gəncə stadionunda biabırçılıqlar bitib-tükənmir
Axır ki böyük futbol sözün əls mənasında Gəncəyə qayıtdı.
“Kəpəz” bu mövsüm ilk dəfə doğma meydanda çıxış etdi. Yaxşı-pis təşkilatçılıqla bağlı işlər görülmüşdü. Amma deyəsən, hər şey görüntü xatirinə idi. Arenanın özündə o qədər problem olub ki... Adam bilmir hardan başlasın. Bir yerindən yapışıb, nələrisə demək lazımdı.
Başlayaq elə azarkeşlərdən. Məsələn, oyuna 10 manatlıq VİP bilet alan fanatlar öz yerlərində otura bilməyiblər. Və çarəsiz qalıb adi bileti olan azarkeşlərlə birgə əyləşiblər. Adamlar haqlı olaraq əməkdaşlarımızla söhbətdə iradlarını bildiriblər ki, belə olacaqdısa, 3 manatlıq bilet alardıq. Görəsən, nə baş verib? Nə üçün VİP bilet sahibləri öz yerlərində otura bilməyiblər? Bu sualı “Kəpəz”in mətbuat katibi Azad Mustafayevə ünvanladıq:
“Azarkeşlərimizin kluba bununla bağlı hansısa narazılığı olmayıb. Kimsə “10 manatlıq bilet almışam və yerimdə oturmamışam” deyirsə, bununla bağlı bizdə məlumat yoxdu. Belə bir şey olsaydı, bilərdik. Ora polis təhkim etmişdik. Mühafizə xidmətimizin əməkdaşları da həmin sektora nəzarət edirdi. Hətta könüllülər biletlərə baxıb, azarkeşləri öz sektorlarına yönəldirdi. Mən inanmıram və eşitməmişəm ki, kimsə VİP biletlərə görə narazılıq etsin”.
Söhbət könüllülərdən düşmüşkən, oyun günü Gəncədə olan əməkdaşlarımızın dediyinə görə, klub rəhbərliyinə kömək etmək üçün Bakıdan bir avtobus gənc gedib. Bu şəxslər təşkilatçılıq baxımından klublara yardım göstərir. Könüllülərin olması faydalıdı. Bəs nə üçün şəhərin öz gəncləri bu işlə məşğul olmur? Niyə Bakıdan Gəncəyə könüllülər dəvət olunub? Klub rəsmisi sualımızı belə cavabladı:
“Doğru buyurursuz. Könüllülər Bakıdan gəlmişdi. Onların futbol təcrübəsi olduğu üçün belə addım atmışdıq. İlk oyun olduğuna görə bundan yararlanmaq istədik. Düşündük ki, belə daha məqsədəuyğun olar. Çünki onlar təcrübəlidi. Bilirlər ki, nəyi necə etmək lazımdı. Təbii ki, Gəncədə də könüllülər var. Amma onların futbol təcrübəsi yoxdu. Gələcəkdə şəhərimizdəki könüllü qrupları ilə işləməyi nəzərdə tutmuşuq”.
Ən vacib məsələ isə elektron tablo ilə bağlı idi. Oyunçu dəyişiklikləri zamanı köhnə üsuldan belə istifadə olunmadı. 4-cü hakim futbolçunun yanında durur, əlindəki kağızda əvəzləmələri qeyd edir, vəssalam! Bu biabırçılığın səbəbini Azad bəy belə izah etdi:
“Hamıya bəllidi ki, oyun gününə hazırlıq həftənin əvvəlindən başlayır. Bizdə də tablo həmişə işləyib. Əvəzedici komandanın oyunlarında da işlətmişik. Oyun günü də bütün texniki avadanlıqlar yoxlanılıb. Həmin vaxt elektron tablo işlək olub. Sadəcə, oyun ərzində nə qədər çalışdılar, açılmadı. Tabloya enerji gəlmədi. Həmin anda da bizim texniki işlərlə məşğul olan əməkdaşımız onu düzəltməyə çalışdı. Bunu bacardı da, amma vintlərini bağlayandan sonra tablo yenə işləmədi. Sonra da bəlli oldu ki, ümumiyyətlə, nasazlıq olub. Bu texnikadı, hər yerdə nəsə ola bilir. Hətta siz işlədiyiniz yerdə də ola bilər. Həmişə texnika ilə bağlı hər yerdə problem yaranır. PFL əməkdaşları da gördülər ki, bizim tərəfdən hansısa problem olmadı. Sadəcə, avadanlıq işləmədi”.
Bu gün səhər saatlarında bütün sosial şəbəkələrdə informasiya yayıldı ki, Gəncə şəhərində yeni stadion tikiləcək. Bunu da Mustafayev “Radio Enerji”yə açıqlamasında özü deyib. Görəsən, şad xəbər var? Azad bəyi dinləyək:
“Bu xəbər çoxdan var idi. Rəsmilər açıqlamalar vermişdilər ki, Gəncə şəhər stadionu söküləcək, yerində yenisi tikiləcək. Məndən stadionun təmiri ilə bağlı soruşdular. Dedim ki, istismar müddətini bitirmiş stadiondu. Yaxın gələcəkdə sökülüb, yenidən tikilməsi gözlənilir. Gəncəyə yeni stadion yaraşar. Mən hamının danışdığı və bildiyi şeyi demişəm”.
İLKİN SULTANLI
Digər xəbərlər
