Xosep Qvardiola Erlinq Holann ilə bağlı təkzib verib.

Buna “El Chiringuito”da yayılan məlumat səbəb olub. İspaniya telekanalı futbolçunun “Mançester Siti” ilə imzaladığı müqavilədə “Real”la bağlı bəndin olduğunu iddia edib. Həmin bəndə əsasən, norveçli hücumçu 2024-cü ilin yayında bu kluba keçə bilər. İddiaya görə, Erlinq özü bu şərtin müqavilədə olmasını istəyib. “Real”ın anlaşmanın həmin bəndində göstərilən məbləği ödəməklə “Mançester Siti” ilə heç bir danışıq aparmadan oyunçunu ala biləcəyi qeyd edilib. MS-yə bu yay Dortmund “Borussiya”sından keçən Holann müddəti 2027-ci ilin yayına qədər nəzərdə tutulan müqavilə imzalayıb. Lakin Qvardiola sözləşmədə onun hər hansı kluba keçə biləcəyi ilə bağlı bəndin olmadığını bildirib.