Bir neçə gün əvvəl Marko Campaolo ilə yolları ayıran “Sampdoriya”nın yeni çalışdırıcısı məlum olub.

Football-plus.az xəbər verir ki, rəhbərlik baş məşqçi vəzifəsinə Deyan Stankoviçi təyin edəcək.

55 yaşlı Campaolo işindən uğursuz nəticələrə görə azad edilib. Komanda bu mövsüm A seriyasının 8 turundan sonra 2 xal toplayıb və sonuncu - 20-ci yerdədi. Geniyalıları bu ilin yanvarından çalışdıran Campaoloya Stankoviçin xələf olacağını Nikolo Skira xəbər verib. Tanınmış jurnalist onun “Sampdoriya” ilə müddəti 2023-cü ilin yayına qədər razılaşdırılan müqavilə imzalayacağını, komanda A seriyasında qalacağı halda əməkdaşlığın birilliyə yenilənəcəyini bildirib.

Stankoviç futbolçu karyerasının böyük hissəsini İtaliyada keçirib. 1998-2004-cü illərdə “Latsio”nun, 2004-13-cü illərdə isə “İnter”in formasını geyib. 44 yaşlı serbiyalı mütəxəssis məşqçilik karyerasına da Apennində başlayıb: 2014/15 mövsümündə “Udineze”də baş məşqçinin köməkçisi funksiyasını yerinə yetirib. O, indiyədək yalnız “Srvena Zvezda”da baş məşqçi olub. Serbiya klubuna 2019-22-ci illərdə rəhbərlik edib.