“Futbol+”in dəyərli oxucularına təqdim etdiyim son yazım “Qarabağ” - “Neftçi” qarşılaşması barədə idi.

Komandaların şanslarına toxunaraq vurğulamışdım ki, görüşün əhəmiyyəti “ağ-qaralar” üçün xüsusilə böyükdü. Həmin oyuna qədər xallar eyni idi. Lakin itirilməmiş xalların sayına görə ağdamlılar rəqibini qabaqlayırdı. Heç şübhəsiz, az adam “Turan Tovuz”un təxirə salınan oyunda “Qarabağ”ı büdrədə biləcəyinə inanır. Buna görə də “Neftçi” vəziyyəti düzgün qiymətləndirib “Qarabağ”la oyuna ciddi yanaşardı, ən xırda nüansı belə öz xeyrinə çevirməyə çalışardı. Əbəs yerə ötən yazımda vurğulamamışdım ki, “Neftçi” Azərbaycan derbisində xal itirsə, bunun əsas günahkarı komandanın rumıniyalı baş məşqçisi Laurentsiu Regekampf olacaq. Niyə belə düşündüyümü yazının gedişində oxucuların diqqətinə çatdıracam. Təxminlər doğruldu, “Qarabağ” “Azərsun Arena”dan rəqibini əliboş yola saldı. Halbuki bu görüşdə xal qazanmaqla “ağ-qaralar” həm intiriqanı, həm də özlərinin qızıl medallara şanslarını qoruyacaqdı. Təsadüfi deyil ki, bu məğlubiyyətdən sonra bakılılar heç ikinci pillədəki yerini də qoruya bilmədi, üçüncü yerə gerilədi.

Nə üçün bunu təsadüf saymıram? “Neftçi” bu mövsüm əsas rəqiblərinin ikisinə də uduzub. Azərbaycan çempionatı ilə yaxından maraqlanan hər kəs bu fikrimlə razılaşar ki, cari mövsümdə çempionluq mübarizəsində olan üçüncü komanda “Sabah”dı. “Qarabağ”ın hər iki rəqibindən şanslı və təcrübəli olduğu məlumdu. Amma “Neftçi” ilə “Sabah”dan fərqli “köhlən atlar” avrokuboklarda mübarizəni davam etdirir. Deməli, hələ bir müddət Qurban Qurbanovun yetirmələri iki “cəbhə”də mübarizə aparmalıdı. Belə məqamda “Sabah”la “Neftçi” işin ciddiyyətini anlamalı, fürsəti düzgün dəyərləndirməlidi. “Sabah” bunu az-çox bacarır, amma “Neftçi” sanki indidən taleyi ilə barışıb, çempionluq iddiasından əl çəkib. Daha doğrusu, Regekampf. Rumıniyalı mütəxəssisin bu qarşılaşmadan öncə verdiyi açıqlamanı oxumuşduz. Çiynində dağdan ağır məsuliyyət olan çalışdırıcı deyirdi ki, “Qarabağ”la oyuna xüsusi yanaşmağa, hansısa gücləndirilmiş hazırlıq keçməyə ehtiyac görmür, əsas rəqiblə oyuna sıradan bir qarşılaşma kimi yanaşır.
Bəli, hər bir mütəxəssis bunu deyə, rəqibinin gücünü azaltmağa çalışa bilər. Bununla da bir növ rəqibin bostanına daş atmış olursan. Amma kim sənə deyir ki, belə həssas məqamda dediyinlə əməlin üst-üstə düşsün? Dildə bir söz de, lakin əməldə fərqli davran da. Komandanı təxminən üç ay əvvəl qəbul edən bir məşqçi öz işinə və yetirmələrinin hazırlığına daha ciddi yanaşmağa borcludu. Özü də səni əsas rəqibinlə oyun gözləyirsə, məsuliyyətli olmalısan. Bəs Regekampf nə etdi? Milli komandaların oyunları ilə bağlı yaranan fasiləni dəyərləndirmək əvəzinə ölkəsinə yollandı. Halbuki burda qalmaqla həm rəqibi daha yaxşı təhlil edər, həm düşərgədə qalanları oyuna, həm də özü taktiki-texniki məşqlərin nəzəriyyəsini hazırlayardı. Əvəzində ölkəsinə getdi və orda birinci həyat yoldaşıyla dalaşdı, küçənin ortasında ona zor tətbiq etməyi, qadına əl qaldırmağı özünə sığışdırdı. Bu əməlinə görə hər kəs onu qınadı. Gözləmək olardı ki, “Neftçi” rəhbərliyi də baş məşqçidən hesabat tələb edəcək, ölkənin ən qocaman klubunun imicinin qayğısına qalacaq. Onlar da sanki hər kəsə acıq verirmiş kimi Buxarestə yollandı və Regekampfın yeni evliliyindən doğulan uşağının xaç suyuna salınması mərasiminə qatıldı. Üstəlik kameraların önündə xoşbəxt sima ilə poza verdilər.

Həmin vaxt “Qarabağ” və onun baş məşqçisi nə edirdi? Qurban Qurbanov düşərgədə qalan, milli komandalara yollanmayan futbolçularına istirahət verdi. Həmin istirahətdən sonra məşqlər bərpa olundu və eşitdiyimə görə, futbolçular öz aralarında ikitərəfli oyun da keçirdilər. Vətənində həyat yoldaşına əl qaldıran, daha sonra uşağını xaç suyuna salan Regekampf gəzib-dolanıb gələndən sonra komandasını “Qarabağ”la oyuna hazırladı. Bu laqeydliyin nə ilə nəticələndiyini də “Azərsun Arena”da gördük. Rumıniyalı çalışdırıcı bu məsul oyuna o qədər etinasız yanaşmışdı ki, üst-başına əl gəzdirməyi unutmuşdu. Çalışdırıcı diqqət mərkəzində olduğu qarşılaşmaya qeyri-ciddi geyimdə, məşq kostyumunda çıxmış, şalvarının bir ayağının ətəyi topuğundan da xeyli yuxarı qalxmışdı. Əlbəttə, bütün bunlar onun şəxsi işidi. Yoldaşıyla dalaşmaq da, uşağını məhz indiki məqamda xaç suyuna salmaq da, hamının maraqla gözlədiyi qarşılaşmaya o cür geyimdə çıxmaq da rumıniyalının seçimidi. Amma bütün bunlardan sonra “Qarabağ” kimi ciddi rəqibi məğlub etməyə ümid edə bilməzsən, cənab Regekampf. Əməllərinin “mükafatı” əsas rəqibə boyun əymək, ilk dövrəni üçüncü pillədə bitirmək perspektividi. Bu məğlubiyyətin əsas cavabdehi olduğunuzla razılaşın. Ümid edirəm ki, sonrakı peşmanlığın fayda vermədiyini bilirsiz.

AMAL