Fasilə bitdi, seyrə davam edirik. Milli komandaların oyunları ilə bağlı Azərbaycanda və Avropanın əksər ölkələrində çempionatlara verilən fasilələri nəzərdə tuturam.

Bəli, yığmaların oyunları hər nə qədər maraqlı keçsə də, daxili çempionatlardakı gərginliyin yerini vermir. Üstəlik Millətlər Liqasının sönük, heç nəyin həll etməyən qarşılaşmaları fanatların futbola ehtiyaclarını heç ödəmir. Ona görə də səbirsizliklə fasilənin bitməsini, klubların yenidən meydana çıxmasını arzulayırdıq. Nəhayət, gözlənilən an yetişdi. Dünən keçirilən “Səbail” - “Qəbələ” qarşılaşmasıyla Azərbaycan premyer-liqası da qaldığı yerdən davam edir. Etiraf etmək lazımdı ki, yeni mövsüm son illərdə izlədiyimiz çempionatlara nisbətən daha maraqlı keçir. Bunun da fərqli səbəbləri var.

Əsas səbəblərdən biri, heç şübhəsiz, “Turan Tovuz”la “Kəpəz”in elitaya gətirilməsindən sonra say artımıdı. Bu artım həm də bölgələrə böyük futbolun qayıdışını şərtləndirən amildi. Düzdü, məlum səbəblərdən “Kəpəz” hələ də doğma azarkeşlərinin önündə oynaya bilmir. Gəncəli futbolsevərlər doğma komandalarının oyunlarına həsrət qalıb. Səbəb də odu ki, “Kəpəz”i çempionata tələm-tələsik buraxdılar. Nədənsə lisenziyalaşdırmanın tələbləri bu dəfə yada düşmədi. Bir də gözümüzü açıb gördük ki, elita təmsilçisinə çevrilən “Kəpəz”in stadionunun tribunaları qəzalı vəziyyətdədi, komandanın heç avtobusu yoxdu. Qərb bölgəsinin digər təmsilçisi “Turan Tovuz”un da avtobusu yoxdu, komanda səfər oyunlarına icarəyə götürülən avtobusla gedir. Amma “Turan Tovuz”un stadionu yaxşı vəziyyətdədi, tovuzlular doğma komandalarına dəstək verəcək qədər şanslıldılar. Bu da ona görə mümkün olub ki, AFFA UEFA-nın ayırdığı yardım sayəsində Tovuzdakı stadionu təmir edib. Avropadan gələn pul olmasaydı, indi “Turan Tovuz”u da “Kəpəz”in aqibəti gözləyirdi. Bütün bu problemlər öz yerində. Çempionatı daha maraqlı edən başqa amillərə nəzər yetirək. Onda görürük ki, “Sabah” əməlli-başlı güclənib, çempionluq mübarizəsinə müdaxilə edəcək kimi görünür. “Qəbələ”nin heyəti və büdcəsi kasad görünsə də, adından söz etdirir.

Sözsüz, güclü və maraqlı Misli premyer-liqası üçün “Neftçi” amili önəmlidi. Bunu illər öncə yazmışam, hər fürsətdəcə dilə gətirmişəm. İki mövsüm öncə “Neftçi” “Qarabağ”a əməlli-başlı rəqabət təklif edə bildi, Bolqarıstandan gələn Əhməd Əhmədovun həlledici qoluyla çempionluq kubokunu rəqibinin əlindən aldı. Diqqət yetirin, bundan sonra “Qarabağ” daha da gücləndi, çempionata xeyli ciddi yanaşmağa başladı. Elə bunun da nəticəsi idi ki, qaçırılan çempionluq ötən mövsüm geri qaytarıldı. Üstəlik “köhlən atlar” avrokuboklarda da yetərincə inamlı təsir bağışlayır. Ötən il Konfrans Liqasında qrupdan çıxmağı bacaran “Qarabağ” bu yay da azarkeşlərini coşdurdu, Çempionlar Liqasının qrupunun kandarından qayıtdı. Heç şübhəsiz, Ağdam təmsilçisinin belə güclənməsində “Neftçi”nin rəqabətədavamlı səviyyəyə çatması, daxili çempionatda rəqabət yaranması əhəmiyyətli rol oynayır. Buna görə də çox istərdik ki, “Neftçi” sükanı belə saxlasın, bu mövsüm də çempionluq yarışı son turlara qədər davam etsin.

Az əvvəl qeyd etdiyim kimi, “Sabah”ı da çempionluq yarışında görürük. Lakin bu məsələdə bir qədər ehtiyatlı davranmağa məcburuq. Çünki ötən mövsüm də “Sabah” yaxşı transferlər etmiş, mövsümə yaxşı hazırlaşmışdı. Di gəl ki, sonda Masazır təmsilçisi nə mükafat qazandı, nə də avrokuboklara vəsiqə. Ona görə də “Sabah”ın birdən-birə qızıl medallar uğrunda yarışa biləcəyini demək risklidi. Bu mənada nəzərlərimiz yenidən “Neftçi”yə çevrilir. Yeni baş məşqçi Laurentsiu Regekampfın, eləcə də ötən mövsümün gedişində kluba idman direktoru vəzifəsinə gətirilən Zaur Əzizovun və bu yay heyətə qatılan yeni transferlərin qarşısında mühüm vəzifə dayanır. Azarkeşlərin onlara ümidi böyükdü. Ən azı bu ümidləri doğrultmaq üçün sona qədər mübarizə aparmaq lazımdı. Şəxsən mənim üçün “Neftçi”nin bunu bacarıb-bacarmayacağını demək çətindi. “Ağ-qaralar” bu mövsüm də avrokuboklarda uğursuzluqla üzləşdi. “Sabah”la görüşdəki 1:2 hesablı məğlubiyyət də komandanın iddialarının üzərinə qara kölgə saldı. Düzdü, lider “Qarabağ”la xal fərqi yoxdu, “köhlən atlar” 7 turun nəticələrinə görə “Neftçi”ni yalnız topların daha yaxşı fərqinə görə qabaqlayır. Sadəcə, “Qarabağ” “Neftçi”dən bir oyun az keçirib, Qurban Qurbanovun komandasının “Turan Tovuz”la görüşü təxirə salınıb.

Deməli, itirilən xalların hesabatını aparsaq, “Neftçi”nin “Qarabağ”dan 3 xal geridə qaldığını qəbul etməliyik. Bu mənada “Azərsun Arena”da keçirilən qarşılaşmanın “Neftçi” üçün əhəmiyyəti böyükdü. “Ağ-qaralar” bu görüşdə məğlub olsa, ən böyük cavabdeh Regekampf sayılacaq. Bu barədə “Neftçi”nin “davam, yoxsa tamam” sualına hansı cavabı verəcəyini biləndən sonra danışarıq.

AMAL