“Azərbaycanda təbii ot örtüklü stadionlar payızda və yazda renovasiya olunmalıdı. Yəni ildə iki dəfə. Buna yüngül renovasiya deyilir. Payızda ona görə edirlər ki, qışda Günəş işığı az dəyəndə otun dözümlülüyü artsın, xarab olmasın. Hər iki dövrdəki renovasiya prosesi tam fərqlidi. Hazırda BOS-un problemi nədi? Biz avqustun sonuna kimi gözlədik ki, sentyabr və oktyabrın təqvimi bəlli olsun. Çünki arenada oyunların baş tutmaq ehtimalı var idi. Görüşlərin vaxtı bəlli olmalı idi ki, biz də renovasiyanın tarixini dəqiqləşdirək. Bir də üç ildi BOS-da əsaslı renovasiya olmur. Bu prosesi indiki dövrə planlamışdıq. Yəni payızın ilk aylarında bunu həyata keçirəcəkdik. Fikirləşdik ki, yüngül renovasiya etmək əvəzinə əsaslıya üstünlük verək. Bunu da soyuq aylarda həyata keçirmək daha məqsədəuyğundu. Belədə ot daha dözümlü olur. Biz nə üçün renovasiya edirik? Millinin növbəti ilin martında Avropa çempionatının seçmə mərhələsində oyunları var. Həmin görüşlər BOS-da keçirilə bilər. Bu vaxta qədər ot daha yaxşı vəziyyətə gəlməlidi. Həm də örtük artıq köhnəlib və yenilənməyə ehtiyacı var. Bu səbəbdən də oktyabrın sonunu gözləyirdik. U-21 də bu ərəfədə təlim-məşq toplanışı keçirdi. Məsləhət oldu ki, onların oyunları BOS-da keçirilsin. Rəqib Qırğızstan idi. Amma son anda onları “Şamaxı” əvəzlədi. Biz də qərara gəldik ki, tək bu oyun üçün renovasiya etməyə gərək yoxdu. Onsuz da oktyabrda əsaslı renovasiya olacaq. Bununla proses üçün xərclənən pulu iki dəfə azaltdıq. Həm də “Şamaxı” ilə görüş rəsmi oyun sayılmır ki, stadionu iki dəfə renovasiya edək. Düzdü, bunu başqa vaxt etmişik. Məsələn, Azərbaycan - Portuqaliya görüşündən sonra ot örtüyünü renovasiya etmişik. Buna səbəb “Qarabağ”ın Konfrans Liqasının ilk turunda “Bazel”lə oynaması idi. Stadionu 3 həftəlik renovasiya etdik ki, Ağdam təmsilçisinin görüşündə problem olmasın. Bunu etmək məcburiyyətindəydik. Çünki həmin görüşlər rəsmi matçlardı. Yoxlama görüşü üçün meydanın ideal vəziyyətə gətirilməsi məntiqə sığmır. Bazar ertəsindən etibarən görəcəksiz ki, stadionda əsaslı renovasiya işləri gedəcək. İnşallah, oktyabrın 9-da Azərbaycan millisi üçün münasib rəqiblər düşər. Ümid edirəm ki, martda yenə yığmamızın oyunlarını qəbul edəcəyik.”